ബാലഭാസ്കറിൻറെ മരണം; സ്റ്റീഫൻ ദേവസിയെ സിബിഐ ചോദ്യം ചെയ്യും
തിരുവനന്തപുരം: വയലിനിസ്റ്റ് ബാലഭാസ്കറിൻറെ മരണവുമായി ബന്ധപ്പെട്ട് സ്റ്റീഫൻ ദേവസിയെ സിബിഐ ചോദ്യം ചെയ്യും. വ്യാഴാഴ്ചയാണ് ചോദ്യം ചെയ്യുന്നത്.
നേരത്തെ തിരുവനന്തപുരത്ത് ചോദ്യം ചെയ്യലിന് ഹാജരാകാൻ സിബിഐ, സ്റ്റീഫൻ ദേവസിയോട് ആവശ്യപ്പെട്ടിരുന്നു. എന്നാൽ ക്വാറൻറൈനിലായതിനാൽ ഹാജരാകുവാൻ അദ്ദേഹം സാവകാശം ചോദിച്ചിരുന്നു.
അതേസമയം, ബാലഭാസ്കറിൻറെ മരണവുമായി ബന്ധപ്പെട്ട് നാല് പേർക്ക് നുണപരിശോധന നടത്തും. ബാലഭാസകറിൻറെ സുഹൃത്ത് വിഷ്ണു സോമസുന്ദരം, പ്രകാശൻ തമ്ബി, ഡ്രൈവർ അർജുൻ, കലാഭവൻ സോബി എന്നിവരാണ് നുണ പരിശോധനയ്ക്ക് തയാറാണെന്ന് കോടതിയിൽ സമ്മതം അറിയിച്ചത്. ഡൽഹി, ചെന്നൈ ഫോറൻസിക് ലാബിലെ വിദഗ്ദ സംഘമാണ് നുണ പരിശോധന നടത്തുന്നത്. നേരത്തെ, ഇവർ നാല് പേരെയും നുണ പരിശോധനയ്ക്ക് വിധേയരാക്കാൻ സിബിഐ കോടതിയിൽ അപേക്ഷ സമർപ്പിച്ചിരുന്നു.
