ഇന്ത്യയിലെ അർഹരായ വിദ്യാർഥികൾക്ക് ഫോട്ടോഷോപ്പ് ഒരു വർഷത്തേക്ക് സൗജന്യമായി നൽകാൻ അഡോബി

ഇന്ത്യയിലെ അർഹരായ കോളേജ് വിദ്യാർഥികൾക്ക് ഫോട്ടോഷോപ്പ് ഒരു വർഷം സൗജന്യമായി ഉപയോഗിക്കാനുള്ള അവസരമൊരുക്കി അഡോബി. വാർഷിക നിരക്കായ 1,999 രൂപയ്ക്ക് പകരം 12 മാസത്തെ പ്രീപെയ്ഡ് ഫോട്ടോഷോപ്പ് സബ്സ്‌ക്രിപ്ഷൻ 0 രൂപയ്ക്ക് പ്രൊമോഷണൽ ഓഫറിലൂടെ നൽകും. അഡോബിയുടെ ഔദ്യോഗിക സ്റ്റുഡന്റ് പ്രൊമോഷൻ പേജ് വഴിയാണ് ഈ ഓഫർ ലഭ്യമാകുന്നത്.

യോഗ്യതാ മാനദണ്ഡങ്ങൾ പാലിക്കുന്ന വിദ്യാർഥികൾക്ക് മാത്രമാവും ഓഫർ ലഭ്യമാകുക. ചെക്ക്ഔട്ട് സമയത്ത് വിദ്യാർഥികൾ സ്‌കൂൾ/കോളേജ് സംബന്ധമായ വിവരങ്ങൾ നൽകണം. അഡോബി അക്കൗണ്ട് ഉള്ളതുകൊണ്ട് മാത്രം ഓഫറിന് അർഹത ലഭിക്കില്ല.

അർഹരായ വിദ്യാർഥികൾക്ക് വാർഷിക പ്രീപെയ്ഡ് ഫോട്ടോഷോപ്പ് പ്ലാൻ തിരഞ്ഞെടുത്ത് ആദ്യ വർഷത്തേക്ക് 100 ശതമാനം ഇളവ് നേടാം. വാർഷിക വരിസംഖ്യയായ 1,999 രൂപ ചെക്ക്ഔട്ട് പേജിൽ കാണിക്കുമെങ്കിലും തുടർന്ന് അടയ്ക്കേണ്ട തുക 0 രൂപയായി കുറയും.