ഫ്രാൻസ് കത്തുന്നു; പ്രക്ഷോഭവുമായി 8 ലക്ഷം പേർ തെരുവിൽ
ലോകത്തെ ഏറ്റവും സമ്പന്നരാജ്യങ്ങളിലൊന്നായ ഫ്രാൻസിൽ വർധിക്കുന്ന ജീവിതച്ചെലവിൽ പ്രതിഷേധിച്ച് സർക്കാർവിരുദ്ധ പ്രക്ഷോഭം കത്തുന്നു. പ്രസിഡന്റ് ഇമ്മാനുവൽ മക്രോ നയിക്കുന്ന സർക്കാരിന്റെ സാമ്പത്തിക നയങ്ങൾ അടപടലം പാളിയതോടെ ഫ്രഞ്ച് നഗരങ്ങളാകെ പ്രക്ഷോഭത്തീയിൽ മുങ്ങി. ശനിയാഴ്ച മാത്രം 8 ലക്ഷം പേരാണ് തെരുവിലിറങ്ങിയത്; തലസ്ഥാനമായ പാരീസിൽ മാത്രം 1.10 ലക്ഷം പേർ.
മക്രോ സർക്കാരിന് എവിടെയാണ് പിഴച്ചത്?റഷ്യ-യുക്രെയ്ൻ യുദ്ധം, തൊട്ടുപിന്നാലെ അതിലും രൂക്ഷമായ പശ്ചിമേഷ്യൻ യുദ്ധം – ഇവ രണ്ടുമാണ് പ്രധാനമായും ഫ്രഞ്ച് സമ്പദ്‍വ്യവസ്ഥയെ പിടിച്ചുലച്ചത്. എന്നാൽ, യഥാർഥ വില്ലൻ ഇതല്ല. അതു ഫ്രഞ്ച് സർക്കാരിന്റെ ‘ചെലവുചുരുക്കൽ’ തന്ത്രമാണ്. റഷ്യയ്ക്കുമേൽ ഉപരോധം പ്രഖ്യാപിച്ചതോടെ എണ്ണ (ക്രൂഡോയിൽ), ഗ്യാസ് (എൽഎൻജി, എൽപിജി) എന്നിവ ഇറക്കുമതി ചെയ്യുന്നതിൽ ഫ്രാൻസും ഞെരുക്കം നേരിട്ടു. ഇറാൻ-യുഎസ് യുദ്ധവും തുടങ്ങിയതോടെ സ്ഥിതി കൂടുതൽ വഷളായി.
കൈവിട്ട ഇന്ധനവില∙ ഉദാഹരണത്തിന്, യൂറോപ്പിൽ ഇന്ധനവില ഏറ്റവും കൂടുതലുള്ള രാജ്യങ്ങളിലൊന്നായി ഫ്രാൻസ് മാറി. ഡീസൽ വില ലീറ്ററിന് 2.355 യൂറോയാണ്. യൂറോപ്പിലെ ശരാശരി വിലയായ 2.149 യൂറോയേക്കാൾ ഏറെക്കൂടുതൽ.
പൊള്ളുന്ന വിലക്കയറ്റം∙ സെപ്റ്റംബറിൽ പണപ്പെരുപ്പം 3.4 ശതമാനമായി കൂടി. 2024 ജനുവരിക്ക് ശേഷമുള്ള ഏറ്റവും ഉയരം. ഓഗസ്റ്റിൽ 2.4 ശതമാനമായിരുന്നു. അതായത്, ജനങ്ങൾ നിത്യേന വാങ്ങുന്ന അവശ്യവസ്തുക്കളുടെ വില കത്തിക്കയറി.
കടിഞ്ഞാണില്ലാത്ത കടം∙ 2025ൽ ഫ്രാൻസിന്റെ പൊതുകടവും ജിഡിപിയും തമ്മിലെ അനുപാതം (ഡെറ്റ് ടു ഡിജിപി റേഷ്യോ) 115 ശതമാനമായിരുന്നു. 2026ൽ ഇത് 120 ശതമാനത്തിലെത്തി. ജനങ്ങളുടെ കടബാധ്യത കുതിച്ചുകയറുന്നുവെന്നതിന്റെ മറ്റൊരു തെളിവ്. ഇന്ത്യയിൽ കേന്ദ്രസർക്കാരിന്റെ കട അനുപാതം 55.6 ശതമാനമാണ്.
