കുവൈറ്റ് തീപിടിത്തത്തില്‍ മരിച്ച 11 പേരുടെ സംസ്‌കാരച്ചടങ്ങുകള്‍ ഇന്ന് നടക്കും
തിരുവനന്തപുരം: കുവൈറ്റ് തീപിടിത്തത്തില്‍ മരിച്ച 11 പേരുടെ സംസ്‌കാരച്ചടങ്ങുകള്‍ ഇന്ന് നടക്കും. കണ്ണൂര്‍ കുറുവ സ്വദേശി അനീഷ് കുമാറിന്റെ മൃതദേഹം ഇന്ന് സംസ്‌കരിക്കും. രാവിലെ ഒന്‍പതോടെ മൃതദേഹം കുറുവയിലെ വീട്ടിലെത്തിക്കും. തുടര്‍ന്ന് പൊതുദര്‍ശനം നടക്കും. 11 ന് പയ്യാമ്പലത്താണ് സംസ്‌കാരം.
കൊച്ചിയില്‍ നിന്ന് ഇന്നലെ കണ്ണൂരിലെത്തിച്ച മൃതദേഹം കണ്ണൂരിലെ സ്വകാര്യ ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്.
മരിച്ച പന്തളം സ്വദേശി ആകാശിന്റെ പന്തളം മുടിയൂര്‍കോണത്തെ വീട്ടില്‍ പൊതുദര്‍ശനം ഇന്ന് 11 ന് ആരംഭിക്കും. ഉച്ചയ്ക്ക് രണ്ടോടെ സംസ്‌കാരം നടക്കും. കൊല്ലം സ്വദേശികളായ രണ്ട് പേരുടെ സംസ്‌കാര ചടങ്ങുകളും ഇന്ന് നടക്കും. വെളച്ചിക്കാല വേങ്ങൂര്‍ വടക്കോട്ട് വിളയില്‍ വീട്ടില്‍ ലൂക്കോസിന്റെ സംസ്‌കാരം ഉച്ചയ്ക്ക് നടക്കും. കൊട്ടിയത്തെ സ്വകാര്യ ആശുപത്രിയിലെ മോര്‍ച്ചറിയില്‍ നിന്നും വീട്ടില്‍ എത്തിക്കുന്ന മൃതദേഹം വെളച്ചിക്കാല ഐപിസി സെമിത്തേരിയിലാണ് അടക്കം ചെയ്യുന്നത്.
പുനലൂര്‍ നരിക്കല്‍ വാഴവിള സ്വദേശി സാജന്‍ ജോര്‍ജിന്റെ സംസ്‌കാരം ഉച്ചയ്ക്ക് 12 ന് നടക്കും. നരിക്കല്‍ മാര്‍ത്തോമാ പള്ളിയില്‍ ആണ് ചടങ്ങുകള്‍. പുനലൂരിലെ സ്വകാര്യ ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം രാവിലെ വീട്ടില്‍ എത്തിക്കും.
തിരുവല്ല സ്വദേശി തോമസ് ഉമ്മന്റെ സംസ്‌കാരം ഞായറാഴ്ച നടക്കും. ദുരന്തത്തില്‍ മരിച്ച സിബിന്‍, സജു വര്‍ഗീസ്, മാത്യു തോമസ് എന്നിവരുടെ സംസ്‌കാരം തിങ്കളാഴ്ച നടത്താനാണ് ബന്ധുക്കള്‍ തീരുമാനിച്ചിരിക്കുന്നത്. കോട്ടയം പാമ്പാടി സ്വദേശി സ്റ്റെഫിന്‍ ഏബ്രഹാം സാബുവിന്റെ സംസ്‌കാരവും തിങ്കളാഴ്ച നടക്കും. പാമ്പാടിയിലെ വാടക വീട്ടിലും പുതുതായി നിര്‍മിക്കുന്ന വീട്ടിലും പൊതുദര്‍ശനം നടത്തും.
പായിപ്പാട് സ്വദേശി ഷിബു വര്‍ഗീസിന്റെ സംസ്‌കാര ശുശ്രുഷകള്‍ നാളെ വൈകുന്നേരം നാലിന് പായിപ്പാട് സെന്റ് ജോര്‍ജ് മലങ്കര കത്തോലിക്ക പള്ളി സെമിത്തേരിയില്‍ നടക്കും. ഇത്തിത്താനം സ്വദേശി ശ്രീഹരി പ്രദീപിന്റെ സംസ്‌കാരം നാളെ രണ്ടിന് വീട്ടുവളപ്പില്‍ നടക്കും.
മരിച്ച മലയാളികളില്‍ എട്ട് പേരുടെ മൃതദേഹങ്ങള്‍ ഇന്നലെ സംസ്‌കരിച്ചിരുന്നു. നെടുമങ്ങാട് അരുണ്‍ ബാബു, ശൂരനാട് ഷമീര്‍, വാഴമുട്ടം മുരളീധരന്‍ നായര്‍, ഇടവ ശ്രീജേഷ് തങ്കപ്പന്‍, പെരിനാട് സുമേഷ് എസ്.പിള്ള, ചാവക്കാട് ബിനോയ് തോമസ്, തിരൂര്‍ നൂഹ്, പുലാമന്തോള്‍ ബാഹുലേയന്‍, കണ്ണൂര്‍ വയക്കര നിതിന്‍, തലശേരി വിശ്വാസ് കൃഷ്ണന്‍ എന്നിവരുടെ മൃതദേഹങ്ങളാണ് ഇന്നലെ സംസ്‌കരിച്ചത്.
