60 വയസ്സ് മുതൽ പ്രായമുള്ളവർ ബൂസ്റ്റർ ഡോസ് സ്വീകരിക്കുമ്പോൾ മെഡിക്കൽ സർട്ടിഫിക്കറ്റ് വേണ്ടെന്ന് കേന്ദ്രം

60 വയസ്സ് മുതൽ പ്രായമുള്ളവർ ബൂസ്റ്റർ ഡോസ് സ്വീകരിക്കുമ്പോൾ പ്രത്യേക മെഡിക്കൽ സർട്ടിഫിക്കറ്റ് വേണ്ടെന്ന് കേന്ദ്രസർക്കാർ. ചൊവ്വാഴ്ചയാണ് സർക്കാർ തീരുമാനം അറിയിച്ചത്. എന്നാൽ ഡോസ് സ്വീകരിക്കുന്നതിന് മുമ്പ് തങ്ങളുടെ ഡോക്ടറുമായി സംസാരിക്കണമെന്ന നിർദേശം സർക്കാർ മുന്നോട്ടുവെച്ചിട്ടുണ്ട്. 60 വയസ്സിന് മുകളിൽ പ്രായവും സഹജ അസുഖങ്ങളുമുള്ളവർ ബൂസ്റ്റർ ഡോസ് സ്വീകരിക്കുമ്പോൾ മെഡിക്കൽ സർട്ടിഫിക്കറ്റ് ഹാജരാക്കിയിട്ടില്ലെങ്കിലും ഡോക്ടറുടെ ഉപദേശം തേടണമെന്ന് ആരോഗ്യ സെക്രട്ടറി രാകേഷ് ഭൂഷൺ സംസ്ഥാനങ്ങൾക്ക് എഴുതിയ കത്തിൽ പറഞ്ഞു. തെരഞ്ഞെടുപ്പ് ചുമതലയുള്ളവരെയും ബൂസ്റ്റർ ഡോസിന് മുൻഗണന നൽകുന്നവരുടെ ലിസ്റ്റിൽ ഉൾപ്പെടുത്തണമെന്നും കത്തിൽ നിർദേശം നൽകി. എന്നാൽ രണ്ടാം ഡോസ് സ്വീകരിച്ച് ഒമ്പത് മാസം കഴിഞ്ഞാൽ മാത്രം ബൂസ്റ്റർ നൽകിയാൽ മതിയെന്നും പറഞ്ഞു.