മഹാമാരിയുടെ ഭീതി, കളിയുടെ പ്രത്യാശ; 2021ൽ ഇന്ത്യ ഇന്റർനെറ്റിൽ ജീവിച്ചതിങ്ങനെ

കോവിഡ് മഹാമാരി വിതച്ച ജീവഭയവും ആശങ്കയും. അവയിൽ നിന്നു തൽക്കാലത്തേക്കങ്കിലും മുക്തിനേടാൻ അഭയം തേടിയ കായികമത്സരങ്ങൾ… പോയ വർഷത്തിൽ ഇന്ത്യക്കാർ ഗൂഗിളിൽ കൂടുതലായി തെരഞ്ഞ കാര്യങ്ങൾ പരിശോധിക്കുമ്പോഴാണ് ഒരേസമയം വേദനയും സന്തോഷവും പകരുന്ന ഈ തരംഗം കാണാനാകുന്നത്. 2021 നിരവധി കാര്യങ്ങൾ കൊണ്ട് സംഭവബഹുലമായിരുന്നെങ്കിലും അവയ്ക്കെല്ലാം മീതെ കോവിഡും കളികളും ഇരുട്ടിന്റെയും വെളിച്ചത്തിന്റെയും ചിറകുകൾ വിരിച്ചുനിന്നു. മുൻ വർഷവുമായി താരതമ്യം ചെയ്യുമ്പോൾ രാഷ്ട്രീയത്തിന്റെ സ്ഥാനംകൂടി ഇന്ത്യക്കാർ സ്പോർട്സിന് വിട്ടുകൊടുത്തുവെന്ന കൗതുകവുമുണ്ട്.