കാനഡയുടെ അന്വേഷണത്തോട് പൂർണമായി സഹകരിക്കണമെന്ന് ഇന്ത്യയോട് യു.എസ്

വാഷിങ്ടൺ: ഖലിസ്ഥാനി നേതാവ് ഹർദീപ് സിങ് നിജ്ജാറിന്റെ കൊലപാതകത്തിൽ കാനഡയുടെ അന്വേഷണത്തോട് പൂർണമായി സഹകരിക്കണമെന്ന് ഇന്ത്യയോട് യു.എസ്. വിദേശകാര്യ സെക്രട്ടറി ആന്റണി ബ്ലിങ്കൻ ആണ് ആവശ്യമുയർത്തിയതെന്ന് റിപ്പോർട്ട് ചെയ്തു. കേന്ദ്ര വിദേശകാര്യ മന്ത്രി എസ്. ജയശങ്കർ ബ്ലിങ്കനുമായി കൂടിക്കാഴ്ച നടത്തി ഒരു ദിവസത്തിനുശേഷമാണ് കാനഡ വിഷയത്തിലെ യു.എസ് ഇടപെടൽ വാർത്തയാകുന്നത്.

അഞ്ചുദിവസത്തെ ഔദ്യോഗിക സന്ദർശനത്തിനായാണ് ജയശങ്കർ യു.എസിലെത്തിയത്. വ്യാഴാഴ്ച വിദേശകാര്യ മന്ത്രാലയം ഓഫിസിൽ വച്ചായിരുന്നു ജയശങ്കർ-ബ്ലിങ്കൻ കൂടിക്കാഴ്ച. ഇതിൽ ഇന്ത്യ-കാനഡ നയതന്ത്ര തർക്കം ചർച്ചയായി. കാനഡയുടെ അന്വേഷണവുമായി സഹകരിക്കാൻ യോഗത്തിൽ ബ്ലിങ്കൻ ജയശങ്കറിനോട് ആവശ്യപ്പെട്ടതായി വിദേശകാര്യ മന്ത്രാലയം വക്താവ് അറിയിച്ചു.