വണ്‍പ്ലസ് നോര്‍ഡ് 2 ഈ വര്‍ഷം തന്നെ; എത്തുന്നത് മീഡിയടെകിന്‍റെ ഫ്ലാഗ്ഷിപ്പ് ചിപ്സെറ്റുമായി
വണ്‍പ്ലസ് അവരുടെ ഫ്ലാഗ്ഷിപ്പ് സീരീസായ വണ്‍പ്ലസ് 9 ഈ മാസം തന്നെ ലോഞ്ച് ചെയ്യാനിരിക്കുകയാണ്. സമീപകാലത്ത് കമ്ബനി വിപണിയിലെത്തിച്ച്‌ ആഗോളതലത്തില്‍ പോലും തരംഗമായ വണ്‍പ്ലസ് നോര്‍ഡ് സീരീസിലും ഈ വര്‍ഷം പുതിയ അവതാരം പിറവിയെടുക്കും. ഈ വര്‍ഷം രണ്ടാം പാദത്തില്‍ വണ്‍പ്ലസ് നോര്‍ഡ് 2 വിപണിയിലെത്തിക്കാനാണ് കമ്ബനി കണക്കുകൂട്ടുന്നത്.
മീഡിയടെകിന്‍റെ ഡൈമന്‍സിറ്റി 5ജി ചിപ്സെറ്റ് സീരീസിലെ പുത്തന്‍ പോരാളിയായിരിക്കും നോര്‍ഡ് 2ന് കരുത്ത് പകരുക. ഡൈമന്‍സിറ്റി 1200 എന്ന ഏറ്റവും പുതിയ 5ജി പ്രൊസസറാണ് മീഡിയടെക് വണ്‍പ്ലസിന് നല്‍കുന്നത്. അതിലൂടെ ഇരുകമ്ബനികളും ആദ്യമായി ഒന്നിക്കുന്നു എന്ന പ്രത്യേകതയുമുണ്ട്. ഇതുവരെ സ്നാപ്ഡ്രാഗണ്‍ പ്രൊസസറുകള്‍ മാത്രമാണ് വണ്‍പ്ലസ് ഫോണുകളില്‍ ഉപയോഗിച്ചിരുന്നത്.
വണ്‍പ്ലസ് 9 സീരീസ് ലോഞ്ച് ചെയ്തതിന് പിന്നാലെയാകും നോര്‍ഡ് 2 എത്തുക. പതിവുപോലെ നോര്‍ഡിന്‍റെ വിലയിലേക്കാണ് ടെക്ലോകം ഉറ്റുനോക്കുന്നത്. സ്നാപ്ഡ്രാഗണ്‍ 765ജി-യുമായി എത്തിയ വണ്‍പ്ലസ് നോര്‍ഡ് ഒന്നാമന് 28000 രൂപ മുതലായിരുന്നു വിലയാരംഭിച്ചത്. എന്നാല്‍, മീഡിയടെകിന്‍റെ ഫ്ലാഗ്ഷിപ്പ് പ്രൊസസറായ ഡൈമന്‍സിറ്റി 1200 കരുത്ത് പകരുന്ന നോര്‍ഡ് 2ന് 30000ത്തില്‍ താഴെ വണ്‍പ്ലസ് വിലയിടുകയാണെങ്കില്‍ അത് ചരിത്രമായേക്കും.
168Hz സ്ക്രീന്‍ റിഫ്രഷ് റേറ്റും, 200 മെഗാപിക്സല്‍ വരെ സ്റ്റില്‍ ഫോട്ടോഗ്രഫി പിന്തുണയും മൊബൈല്‍ ഗെയിമിങ്ങിന് റേ-ട്രേസിങ്, ഇരു സിമ്മുകള്‍ക്കും 5ജി കണക്ടിവിറ്റി തുടങ്ങിയ കിടിലന്‍ ഫീച്ചറുകളുടെ കരുത്തുമായാണ് ഡൈമന്‍സിറ്റിയെ മീഡിയടെക് വിപണിയിലെത്തിക്കുന്നത്. മിഡ്റേഞ്ച് ഫോണായ നോര്‍ഡ് 2 ഇത്തരം ഫീച്ചറുകളുമായാണ് എത്തുന്നതെങ്കില്‍ വിപണിയില്‍ തീപാറുമെന്നുറപ്പ്…
