ജോർദാനിൽ ഇസ്രേലി എംബസിക്ക് സമീപം വെടിവയ്പ്
അമ്മാൻ: ജോർദാൻ തലസ്ഥാനമായ അമ്മാനിലെ ഇസ്രേലി എംബസിക്കു സമീപമുണ്ടായ വെടിവയ്പിൽ മൂന്നു പോലീസുകാർക്കു പരിക്കേറ്റു. അക്രമിയെ പോലീസ് പിന്തുടർന്നു വധിച്ചു.
ഞായറാഴ്ച പുലർച്ചെയായിരുന്നു സംഭവം. പട്രോളിംഗ് നടത്തുകയായിരുന്ന പോലീസ് സംഘത്തിനുനേർക്ക് അക്രമി വെടിയുതിർക്കുകയായിരുന്നു. തുടർന്നു രക്ഷപ്പെട്ട അക്രമിയെ ഒരു മണിക്കൂർ പിന്തുടർന്നു വധിച്ചു.
ഭീകരാക്രമണമാണു നടന്നതെന്ന് വാർത്താവിതരണ മന്ത്രി മുഹമ്മദ് മൊമാനി അറിയിച്ചു. അക്രമി മുന്പ് ക്രിമിനൽ, മയക്കുമരുന്നു കേസുകളിൽ ഉൾപ്പെട്ടിട്ടുണ്ട്.
കൂടെക്കൂടെ ഇസ്രേലിവിരുദ്ധ പ്രക്ഷോഭം നടക്കുന്ന സ്ഥലത്താണ് വെടിവയ്പുണ്ടായത്. 1948ൽ ഇസ്രയേൽ രൂപീകരിക്കപ്പെട്ടപ്പോൾ പുറത്താക്കപ്പെട്ട പലസ്തീൻ വംശജരാണ് ജോർദാൻ ജനസംഖ്യയിൽ ഭൂരിപക്ഷവും.
