യുഎഇയിൽ മുതിർന്നവരെ അപമാനിച്ചാൽ തടവും പിഴയും

അബുദാബി∙ യുഎഇയിൽ മുതിർന്ന പൗരന്മാരോട് മോശമായി പെരുമാറിയാൽ രണ്ടു വർഷം തടവും 50,000 ദിർഹം വരെ പിഴയും ശിക്ഷ ലഭിക്കുമെന്ന് പബ്ലിക് പ്രോസിക്യൂഷൻ. പ്രായമായവരുടെ ക്ഷേമം ഉറപ്പാക്കുന്നതിന് 2019ൽ പാസാക്കിയ യുഎഇ ഫെഡറൽ നിയമം കർശനമായി പാലിക്കണമെന്നും അഭ്യർഥിച്ചു.

കുറ്റവാളികൾ ബന്ധുക്കളായാലും വയോജന സ്ഥാപന ജീവനക്കാരായാലും കടുത്ത നടപടിയുണ്ടാകും. 60 വയസ്സിൽ കൂടുതലുള്ളവർക്ക് സ്വകാര്യത, സംരക്ഷണം, പരിസ്ഥിതി, പാർപ്പിടം, വൈദ്യപരിചരണം, ഇൻഷുറൻസ്, സർക്കാർ സേവനങ്ങൾക്കുള്ള മുൻഗണന എന്നിവയ്ക്കുള്ള അവകാശം ഉണ്ടായിരിക്കും. വയോജനങ്ങൾക്കെതിരായ അതിക്രമം കണ്ടിട്ടും റിപ്പോർട്ട് ചെയ്യാത്തവർക്കും ശിക്ഷയുണ്ട്.