എല്ലാ സാമൂഹമാധ്യമ അക്കൗണ്ടുകളും കേന്ദ്ര സര്‍ക്കാര്‍ പരിശോധിക്കും; വാര്‍ത്ത വ്യാജം
ന്യൂഡല്‍ഹി: മൂന്ന് മാസത്തിനുള്ളില്‍ എല്ലാ സാമൂഹമാധ്യമ അക്കൗണ്ടുകളും കേന്ദ്ര സര്‍ക്കാര്‍ പരിശോധിക്കുമെന്ന രീതിയില്‍ പ്രചരിക്കുന്ന വാര്‍ത്ത വ്യാജം. വാര്‍ത്തക്ക് പിന്നാലെ ഡല്‍ഹി ഹൈക്കോടതി അഭിഭാഷകന്‍ പ്രശാന്ത് പട്ടേല്‍ ഉംറാവു ഉള്‍പ്പെടെ നിരവധി പ്രമുഖര്‍. ഈ വ്യാജ സന്ദേശം പങ്കുവച്ചിരുന്നു. എല്ലാ സമൂഹമാധ്യമ അക്കൗണ്ടുകളും മൂന്ന് മാസത്തിനുള്ളില്‍ മൊബൈല്‍ ഫോണുകളിലൂടെ സര്‍ക്കാര്‍ പരിശോധിക്കും. ഇതിനെ സ്വാഗതം ചെയ്യുന്നതായും ഉംറാവു ട്വീറ്റ് ചെയ്തു.
എന്നാല്‍, ഇത്തരത്തില്‍ നിര്‍ദേശങ്ങളൊന്നുമില്ലെന്ന് കേന്ദ്ര സര്‍ക്കാര്‍ അറിയിച്ചു. പിഐബി വസ്തുതാ പരിശോധനാ വിഭാഗം ഇത് വ്യാജപ്രചരണമാണെന്ന് ചൂണ്ടിക്കാട്ടി. പുതിയ മാര്‍ഗരേഖ അനുസരിച്ച്‌ സര്‍ക്കാരോ കോടതിയോ ആവശ്യപ്പെട്ടാല്‍ അധിക്ഷേപകരമായ ഒരു സന്ദേശമോ ട്വീറ്റോ ആദ്യം ആരാണ് പങ്ക് വച്ചതെന്ന് വ്യക്തമാക്കാന്‍ ട്വിറ്റര്‍, വാട്സ് ആപ്, സിഗ്നല്‍, ഫേസ് ബുക്ക് എന്നിവ ഉള്‍പ്പടെയുള്ള സോഷ്യല്‍ മീഡിയകള്‍ തയാറാകണമെന്നാണ് പറയുന്നത്.
