നിർമ്മാണ മേഖലയിൽ ചുവടുറപ്പിക്കാൻ ഡൊണാൾഡ് ട്രംപിന്റെ കമ്പനിയും സൗദിയിൽ എത്തുന്നു.
ജിദ്ദ : നിർമ്മാണ മേഖലയിൽ ചുവടുറപ്പിക്കാൻ ഡൊണാൾഡ് ട്രംപിന്റെ കമ്പനിയും സൗദിയിൽ എത്തുന്നു. ലക്ഷ്വറി താമസ ടവറുകളുടെ പദ്ധതിയാണ് ആദ്യഘട്ടത്തിൽ പ്രഖ്യാപിച്ചിട്ടുള്ളത്. നിർമ്മാണ മേഖലയിലെ മികച്ച അവസരം പ്രതീക്ഷിച്ച് നിരവധി കമ്പനികളാണ് സൗദിയിലേക്ക് നിലവിൽ എത്തുന്നത്.
ജിദ്ദയിൽ ലക്ഷ്വറി താമസ കെട്ടിടങ്ങൾ നിർമ്മിക്കുന്ന പദ്ധതിയാണ് പ്രാദേശിക റിയൽ എസ്റ്റേറ്റ് ഡെവലപ്പേഴ്സുമായി ചേർന്ന് ട്രംപ് ഓർഗനൈസേഷൻ പ്രഖ്യാപിച്ചിട്ടുള്ളത്. കഴിഞ്ഞ മാർച്ചിൽ ദാർ ഗ്ലോബലുമായി ട്രംപ് ഓർഗനൈസേഷൻ 200 മില്യൻ ഡോളറിന്റെ പ്രോജക്ട് ഒമാനിൽ പ്രഖ്യാപിച്ചിരുന്നു. ഇതേ മാതൃകയിലാണ് ഇപ്പോൾ ജിദ്ദയിലും പദ്ധതി പ്രഖ്യാപിച്ചത്. അമേരിക്കൻ മുൻ പ്രസിഡണ്ടായ ഡൊണാൾഡ് ട്രംപിന്റെ കീഴിലുള്ളതാണ് ദി ട്രംപ് ഓർഗനൈസേഷൻ ഇൻ കോപ്പറേറ്റഡ് എന്ന കമ്പനി. ലക്ഷ്വറി നിർമ്മാണ മേഖലയിൽ നേരത്തെ പേരെടുത്ത കമ്പനിയാണ് ട്രംപ് ഓർഗനൈസേഷൻ.
