ന്യൂജേഴ്‌സിയിൽ ദീപാവലി ആഘോഷം കഴിഞ്ഞപ്പോൾ തെരുവുകൾ മാലിന്യക്കൂമ്പാരമായി
ന്യൂജേഴ്‌സി: അമേരിക്കയിലെ ന്യൂജേഴ്‌സിയിൽ ദീപാവലി ആഘോഷങ്ങൾക്കുശേഷം തെരുവുകളിൽ വൻതോതിൽ മാലിന്യം അടിഞ്ഞുകൂടിയതിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നു. ആഘോഷങ്ങളുടെ ഭാഗമായി പൊട്ടിച്ച പടക്കങ്ങളുടെ അവശിഷ്ടങ്ങളും കാർഡ്ബോർഡ് പെട്ടികളും പ്ലാസ്റ്റിക് കവറുകളും ചാരവും പൊതുനിരത്തുകളിൽ ചിതറിക്കിടക്കുന്നതാണ് ദൃശ്യങ്ങളിൽ കാണുന്നത്.
ജേഴ്‌സി സിറ്റിയിലെയും ഇന്ത്യ സ്ട്രീറ്റ് ഉൾപ്പെടെയുള്ള പ്രദേശങ്ങളിലെയും ദൃശ്യങ്ങളാണ് വിവാദത്തിന് കാരണമായത്. റോഡുകളിൽ അടിഞ്ഞുകൂടിയ മാലിന്യം നീക്കം ചെയ്യാൻ അഗ്നിശമനസേനാംഗങ്ങൾ ശക്തിയേറിയ ജലധാരകൾ ഉപയോഗിക്കുന്നതും സമീപത്ത് പോലീസ് ഉദ്യോഗസ്ഥർ നിലയുറപ്പിച്ചിരിക്കുന്നതും പ്രചരിക്കുന്ന വീഡിയോകളിലുണ്ട്.
ആഘോഷങ്ങൾക്കുശേഷം തെരുവുകൾ വൃത്തിയാക്കാനുള്ള ഉത്തരവാദിത്വം സംഘാടകരും ആഘോഷങ്ങളിൽ പങ്കെടുത്തവരും ഏറ്റെടുക്കാത്തതെന്തെന്ന ചോദ്യമാണ് സമൂഹമാധ്യമങ്ങളിൽ ഉയരുന്നത്.
അമേരിക്കയിൽ സ്വന്തം സംസ്കാരവും ആചാരങ്ങളും ആഘോഷിക്കാനുള്ള സ്വാതന്ത്ര്യത്തോടൊപ്പം പൊതുസ്ഥലങ്ങളുടെ ശുചിത്വം സംരക്ഷിക്കാനുള്ള ഉത്തരവാദിത്വവും ഉണ്ടെന്ന് വിമർശകർ ചൂണ്ടിക്കാട്ടുന്നു. പടക്കങ്ങളുടെ അമിത ഉപയോഗം സൃഷ്ടിക്കുന്ന ശബ്ദമലിനീകരണം, അന്തരീക്ഷ മലിനീകരണം, അഗ്നിസുരക്ഷാ പ്രശ്നങ്ങൾ എന്നിവയും ചർച്ചയാകുന്നുണ്ട്.
