ഇ-സഞ്ജീവനി ശക്തിപ്പെടുത്തി; ആശുപത്രി സന്ദര്ശനം ഒഴിവാക്കാന്‍ കൂടുതല് സേവനങ്ങള്: വീണാ ജോര്ജ്
തിരുവനന്തപുരം : സംസ്ഥാനത്ത് കോവിഡ് വ്യാപനം തുടരുന്ന സാഹചര്യത്തില് സര്ക്കാരിന്റെ ടെലി മെഡിസിന് സംവിധാനമായ ഇ-സഞ്ജീവനി സേവനങ്ങള് കൂടുതല് സ്പെഷ്യാലിറ്റി ഡോക്ടര്മാരുടെ സേവനങ്ങള് ഉള്പെടുത്തി ശക്തിപ്പെടുത്തിയതായി ആരോഗ്യ മന്ത്രി വീണാ ജോര്ജ് അറിയിച്ചു. തിരുവനന്തപുരം ശ്രീചിത്ര ഇന്സ്റ്റിറ്റ്യൂട്ടിന്റെ ശിശു ഹൃദ്രോഗ വിഭാഗം ഒപിയും, ചൈല്ഡ് ഡവലപ്മെന്റ് സെന്ററിന്റെ (സി ഡി സി) സ്പെഷ്യാലിറ്റി ഒ പി യുമാണ് പുതുതായി ആരംഭിക്കുന്നത്. എല്ലാ ചൊവാഴ്ചകളിലും ഉച്ചയ്ക്ക് 2 മുതല് 4 വരെയുള്ള ശ്രീചിത്രയുടെ ഒപിയിലൂടെ 20 ഓളം സേവനങ്ങള് ലഭ്യമാകുന്നതാണ്. നിരന്തരമായ ജനങ്ങളുടെ ആവശ്യം കണക്കിലെടുത്തുകൊണ്ടാണ് സിഡിസിയുടെ ഒ പി തുടങ്ങുന്നത്. ഇതുവഴി കോവിഡ് വ്യാപന സമയത്ത് സിഡിസിയിലേക്കുള്ള സന്ദര്ശനം ഒഴിവാക്കി കുട്ടികള്ക്ക് വീട്ടില് ഇരുന്നു തന്നെ സേവനങ്ങള് ഉപയോഗിക്കാന് കഴിയുന്നതാണെന്നും മന്ത്രി വ്യക്തമാക്കി.
