ഹമാസിനെതിരെ ഗാസയിൽ ഇസ്രയേലിന്റെ പോരാട്ടം തുടരവേ മരണസംഖ്യയും ഉയരുന്നു.
ജറുസലം ∙ ഹമാസിനെതിരെ ഗാസയിൽ ഇസ്രയേലിന്റെ പോരാട്ടം തുടരവേ മരണസംഖ്യയും ഉയരുന്നു. അഭയാർഥി ക്യാംപിൽ ഇസ്രയേൽ നടത്തിയ ആക്രമണത്തിൽ 195 പലസ്തീനികൾ കൊല്ലപ്പെട്ടെന്നു ഹമാസ് നേതൃത്വത്തിലുള്ള സർക്കാർ അറിയിച്ചു. ഹമാസിന്റെ 2 കമാൻഡർമാരെ വധിച്ചതായി ഇസ്രയേലും അവകാശപ്പെട്ടു.
സംഘർഷം രൂക്ഷമാകവെ കൂടുതൽ വിദേശികൾ ഗാസയിൽനിന്നു പുറത്തുകടക്കാനുള്ള തയാറെടുപ്പിലാണ്. ഗാസയിലെ വലിയ അഭയാർഥി ക്യാംപായ ജബാലിയയിൽ ഇസ്രയേൽ സൈന്യത്തിന്റെ ആക്രമണമുണ്ടായി. ഇസ്രയേലും ഈജിപ്തും ഹമാസും തമ്മിലുണ്ടാക്കിയ ധാരണപ്രകാരം, 320 വിദേശ പൗരരുൾപ്പെടെ അഞ്ഞൂറോളം പേർ ബുധനാഴ്ച ഗാസ അതിർത്തി കടന്ന് പുറത്തെത്തി.
ഗാസ അതിർത്തി വ്യാഴാഴ്ച തുറക്കുമെന്നും കൂടുതൽ വിദേശികൾ പുറത്തുവരുമെന്നും അധികൃതർ പറഞ്ഞു. ഏറ്റവും ജനസാന്ദ്രതയുള്ള ഗാസ സിറ്റിയിലെ അൽ–ഖുദ്സ് ആശുപത്രിക്കു സമീപം വ്യാഴാഴ്ച പുലർച്ചെ വലിയ സ്ഫോടന ശബ്ദങ്ങൾ കേട്ടതായി പലസ്തീനിയൻ റെഡ് ക്രസന്റ് അറിയിച്ചു. ആശുപത്രിയിൽനിന്ന് എല്ലാവരും ഒഴിയണമെന്നു നേരത്തെ ഇസ്രയേൽ മുന്നറിയിപ്പ് നൽകിയിരുന്നു.
