ഗാസയിലും ബെയ്‌റൂട്ടിലും ആക്രമണം ശക്തമാക്കി ഇസ്രയേൽ
ഗാസ: യുദ്ധത്തിന്‍റെ ഒന്നാം വാർഷികത്തിൽ വടക്കൻ ഗാസയിലും തെക്കൻ ബെയ്‌റൂട്ടിലും ആക്രമണം ശക്തമാക്കി ഇസ്രയേൽ. ഗാസ മുനമ്പിൽ അഭയകേന്ദ്രമായി പ്രവർത്തിച്ചിരുന്ന മോസ്കിനു നേരേ ഇസ്രയേൽ നടത്തിയ ആക്രമണത്തിൽ 19 പേർ കൊല്ലപ്പെട്ടു. ഞായറാഴ്ച പുലർച്ചെ ദെയ്ർ അൽ-ബലാഹിലെ പ്രധാന ആശുപത്രിക്ക് സമീപമുള്ള മോസ്കിനു നേർക്കായിരുന്നു ആക്രമണം.
യുദ്ധത്തെത്തുടർന്ന് പലായനം ചെയ്തവർ കഴിഞ്ഞിരുന്ന അഭയകേന്ദ്രമാണ് ആക്രമിക്കപ്പെട്ടത്. ദെയ്ർ അൽ-ബലാഹിലെ ടൗണിലെ അഭയകേന്ദ്രമായ സ്കൂളിനു നേർക്കുണ്ടായ ആക്രമണത്തിൽ നാലു പേർ കൊല്ലപ്പെട്ടു. തീവ്രവാദികൾക്ക് നേർക്കാണ് ആക്രമണമുണ്ടായതെന്ന് ഇസ്രയേൽ പറയുന്നുണ്ടെങ്കിലും ഇതിനുള്ള തെളിവുകൾ പുറത്തുവിട്ടിട്ടില്ല.
മോസ്കിൽ കൊല്ലപ്പെട്ടവരെല്ലാം പുരുഷന്മാരായിരുന്നെന്ന് ആശുപത്രി രേഖകൾ കാണിക്കുന്നു. വടക്കൻ ഗാസയിലെ ജബാലിയയിൽ വീണ്ടും കര, വ്യോമ ആക്രമണങ്ങൾക്ക് ഇസ്രയേൽ തയാറെടുക്കുകയാണ്. പ്രദേശത്ത് ടാങ്കുകൾ നീങ്ങുന്നതിന്‍റെ ചിത്രങ്ങളും വീഡിയോകളും പ്രചരിക്കുന്നുണ്ട്. ജബാലിയ വളഞ്ഞതായി ഇസ്രയേൽ സൈന്യം അറിയിച്ചു.
