രാജ്യാന്തര നിക്ഷേപക ഉച്ചകോടി 28 മുതൽ അബുദാബിയിൽ
അബുദാബി : രാജ്യാന്തര നിക്ഷേപക ഉച്ചകോടി ഈ മാസം 28, 29 തീയതികളിൽ അബുദാബിയിൽ നടക്കും. നിക്ഷേപത്തിലും നൂതന ആശയങ്ങളിലും ആഗോള നേതാക്കളെ ഒരുമിച്ച് കൊണ്ടുവരുന്ന ഉച്ചകോടിയിൽ പൊതുവിപണി, റിയൽ എസ്റ്റേറ്റ്, നിർമിത ബുദ്ധി, ആരോഗ്യസംരക്ഷണം, സുസ്ഥിരത തുടങ്ങി വിവിധ മേഖലകളുടെ ഭാവിയും വെല്ലുവിളികളും ചർച്ച ചെയ്യും.
ലോകത്തിന്റെ വിവിധ ഭാഗങ്ങളില്‍ നിന്നുള്ള നിക്ഷേപകര്‍, സംരംഭകര്‍, വ്യവസായികൾ തുടങ്ങിയവര്‍ പങ്കെടുക്കും. അതിസമ്പന്നർ ഉൾപ്പെടെ 500ലേറെ പ്രതിനിധികൾ ഉച്ചകോടിക്ക് എത്തുമെന്ന് സംഘാടകര്‍ അറിയിച്ചു.
ഒട്ടേറെ നിക്ഷേപ പദ്ധതികളുടെ പ്രഖ്യാപനവും ഉണ്ടാകുമെന്നാണ് പ്രതീക്ഷിക്കുന്നത്. സംരംഭകര്‍ക്ക് സ്വന്തം സ്റ്റാര്‍ട്ടപ് ആശയങ്ങള്‍ അവതരിപ്പിക്കാനും സാമ്പത്തിക പിന്തുണ തേടാനും അവസരമുണ്ടാകും. ഐവി ഗ്രോത്ത് അസോസിയേറ്റ്‌സും മെഹ്ത വെല്‍ത്തും ചേര്‍ന്നാണ് ഉച്ചകോടി സംഘടിപ്പിക്കുന്നത്.
