സംസ്ഥാനത്ത് കനത്ത ചൂടിനിടയില് അപ്രതീക്ഷിതമായി പെയ്ത കനത്ത മഴയില് വ്യാപക നാശനഷ്ടം
തിരുവനന്തപുരം: സംസ്ഥാനത്ത് കനത്ത ചൂടിനിടയില് അപ്രതീക്ഷിതമായി പെയ്ത കനത്ത മഴയില് വ്യാപക നാശനഷ്ടം. മഴയെത്തുടര്ന്നുണ്ടായ മലവെള്ളപ്പാച്ചിലിലും ഉരുള്പൊട്ടലിലും പെട്ട് ആറ് പേര് മരിച്ചു. നാല് പേരെ കാണാതായി. കോട്ടയം, ഇടുക്കി, മലപ്പുറം ജില്ലകളിലാണ് വലിയ ദുരന്തങ്ങള് റിപ്പോര്ട്ട് ചെയ്തിരിക്കുന്നത്.
ഇടുക്കി മൂന്നാര് വട്ടവട കൊട്ടാക്കമ്പൂര് വില്ലേജിലുണ്ടായ കനത്ത മണ്ണിടിച്ചിലില് രണ്ട് പേര് മരിക്കുകയും ഒരാള്ക്ക് ഗുരുതരമായി പരിക്കേല്ക്കുകയും ചെയ്തു. കൃഷിയിടത്തില് ജോലി ചെയ്യുന്നതിനിടെ മഴ കനത്തപ്പോള് ഷെഡില് കയറി ഇരുന്നവര്ക്ക് മേലേക്ക് 20 അടി ഉയരത്തില് നിന്ന് മണ്ണിടിഞ്ഞ് വീഴുകയായിരുന്നു.
മങ്ങാടന് ബസ് ഉടമ കോട്ടക്കല് മങ്ങാടന് ഹമീദിന്റെ മകന് അനസ് (31), സ്കൂട്ടറില് സഞ്ചരിച്ച ചെന്നൈ സ്വദേശിനി സംഗീതാ അരുള് ലാല് (35), പൂഞ്ഞാര് തെക്കേക്കര പെരിങ്ങുളത്ത് ചേലകാട്ട് വീട്ടില് ജോസഫ് (അപ്പച്ചന്-80), കൊട്ടക്കമ്പൂര് അമ്മന്കോവിലിന് സമീപം താമസിക്കുന്ന ബാലകൃഷ്ണന് പെരുമാള് (51), അയല്വാസി സി. ചിന്നമ്മാള് (38) എന്നിവരാണ് അപകടത്തില് മരിച്ചത്. രണ്ടാമത്തെയാളെ തിരിച്ചറിഞ്ഞിട്ടില്ല. അപകടത്തില് ഗുരുതരമായി പരിക്കേറ്റ ബാലകൃഷ്ണന്റെ ഭാര്യ മാരിയമ്മ (45) മൂന്നാര് ടാറ്റാ ടീ ആശുപത്രിയില് തീവ്ര പരിചരണത്തില് ചികിത്സയിലാണ്. മരിച്ച ബാലകൃഷ്ണന് മൂന്ന് മക്കളും ചിന്നമ്മാള്ക്ക് രണ്ട് മക്കളും ഉണ്ട്.
അതേസമയം സംസ്ഥാനത്ത് വരും മണിക്കൂറുകളിലും ശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കി. പത്തനംതിട്ട, ഇടുക്കി, എറണാകുളം, തൃശൂര്, പാലക്കാട്, കോഴിക്കോട് ജില്ലകളില് ഇടത്തരം മഴയ്ക്കും മണിക്കൂറില് 40 കിലോമീറ്റര് വരെ വേഗതയില് ശക്തമായ കാറ്റിനും സാധ്യതയുണ്ടെന്നാണ് പുതിയ അറിയിപ്പ്. ജനങ്ങള് ജാഗ്രത പാലിക്കണമെന്ന് അധികൃതര് നിര്ദേശിച്ചു
