കോവിഡ് രണ്ടാം തരംഗം ; തൊഴില്‍ നഷ്ടമായത് കൂടുതലും പുരുഷന്‍മാര്‍ക്ക്
ന്യൂഡല്‍ഹി: കോവിഡ് വ്യാപനത്തിന്റെ രണ്ടാം തരംഗം സൃഷ്ടിച്ച പ്രതിസന്ധിയില്‍ തൊഴില്‍ നഷ്ടപ്പെട്ടത് നഗരങ്ങളിലെ സ്ത്രീകളേക്കാള്‍ കൂടുതല്‍ പുരുഷന്‍മാര്‍ക്കെന്ന് റിപ്പോര്‍ട്ട് . സെന്‍റര്‍ ഫോര്‍ മോണിറ്ററിങ് ഇന്ത്യന്‍ ഇക്കോണമിയാണ് ഇത് സംബന്ധിച്ച വെളിപ്പെടുത്തല്‍ നടത്തിയത് . ഇത് ലക്ഷക്കണക്കിന് കുടുംബങ്ങളെ പ്രതിസന്ധിയിലാക്കിയതായും സി.എം.ഐ.ഇ ചൂണ്ടിക്കാട്ടുന്നു .
“കോവിഡ് ആദ്യതരംഗം പ്രതിസന്ധി സൃഷ്ടിച്ചത് സ്ത്രീകളിലായിരുന്നു. നിരവധിപേര്‍ക്ക് തൊഴില്‍ നഷ്ടപ്പെടുകയും വരുമാനം നിലക്കുകയും ചെയ്തു. രാജ്യത്തെ മൊത്തം തൊഴിലിന്‍റെ മൂന്നുശതമാനം നഗരങ്ങളിലെ സ്ത്രീകളു ടേതായിരുന്നു. എന്നാല്‍ ഇതില്‍ തന്നെ 39 ശതമാനം പേര്‍ക്കും ആദ്യ ലോക്ഡൗണില്‍ തൊഴില്‍ നഷ്ടമായിരുന്നു. 63 ലക്ഷം പേര്‍ക്ക് തൊഴില്‍ നഷ്ടമായതില്‍ 24 ലക്ഷവും നഗരത്തിലെ സ്ത്രീകളുടേതായിരുന്നുവെന്നും സി.എം.ഐ.ഇ എം.ഡിയും സി.ഇ.ഒയുമായ മഹേഷ് വ്യാസ് വ്യക്തമാക്കുന്നു .
അതെ സമയം കോവിഡ് രണ്ടാം തരംഗമായപ്പോഴേക്കും സ്ത്രീകളുടെ തൊഴിലുകള്‍ നിലനില്‍ക്കുകയും തൊഴില്‍നഷ്ടത്തിന്‍റെ ഭാരം പുരുഷന്‍മാരിലേക്കെത്തുകയും ചെയ്തു.രാജ്യത്തെ തൊഴില്‍ പങ്കാളിത്തത്തില്‍ 28 ശതമാനമാണ് നഗരത്തിലെ പുരുഷന്‍മാരുടേത്. ഇതില്‍ 30 ശതമാനം പേര്‍ക്കും കോവിഡ് രണ്ടാം തരംഗത്തില്‍ തൊഴില്‍ നഷ്ടപ്പെട്ടതായി കണക്കുകള്‍ ചൂണ്ടിക്കാട്ടുന്നു .എന്നാല്‍ നഷ്ടമായ തൊഴിലുകള്‍ തിരിച്ചുവരുമെന്നും വ്യാസ് ചൂണ്ടിക്കാട്ടുന്നു .
