കൊടും ചൂടിന് പിന്നാലെ പ്രളയം, ഭൂമിയുടെ ഭാവം മാറുന്നു, ഇന്ത്യൻ നഗരങ്ങളും ഭീഷണിയിൽ

അമേരിക്കയിലെ ഡാളസ് നഗരം മുതൽ ചൈനയിലെ ഷാങ്ഹായ് നഗരം വരെ വരൾച്ചയ്ക്കും വെള്ളപ്പൊക്കത്തിനും ഇടയിൽ നിലനിൽപിനായി പാടുപെടുകയാണ്. അതേസമയം സ്‌പെയിനിലെ മാഡ്രിഡും ഈജിപ്തിന്റെ കെയ്‌റോയും ആകട്ടെ കാലാവസ്ഥ വ്യതിയാനത്തിന്റെ അനന്തര ഫലങ്ങളിൽ പെട്ട് ഉഴലുകയാണ്. കാലാവസ്ഥാ പ്രതിസന്ധി രൂക്ഷമാകുന്നതിനനുസരിച്ച്, ലോകമെമ്പാടുമുള്ള പ്രധാന നഗരങ്ങളെല്ലാം പ്രകൃതി ദുരന്തങ്ങൾ നാശം വിതച്ച് മുന്നേറുകയും, മറ്റുള്ളവ തങ്ങളുടെ ഊഴത്തിനായി കാത്തു കിടക്കുകയും ആണ്.

കാലാവസ്ഥാ വ്യതിയാനം ലോകത്തെ ഏതാണ്ട് പൂർണമായും വിഴുങ്ങി കഴിഞ്ഞതായാണ് പുതിയ പഠന റിപ്പോർട്ടുകളും വെളിപ്പെടുത്തുന്നത്. കഴിഞ്ഞ 20 വർഷത്തിനിടെ ലഖ്‌നൗ, മാഡ്രിഡ്, റിയാദ് എന്നിവയുൾപ്പെടെ ഡസൻ കണക്കിന് നഗരങ്ങൾ കാലാവസ്ഥാ വ്യതിയാനത്തിന് ഇരയായിട്ടുണ്ട്. വരണ്ട കാലാവസ്ഥയിൽ നിന്ന് തുടങ്ങി അതി ശൈത്യത്തിന്റെ പിടിയിലേക്കോ, പ്രളയം, വരൾച്ച, ചുഴലിക്കാറ്റ്, ഉഷ്ണതരംഗം, മഞ്ഞുരുക്കം, കാട്ടുതീ തുടങ്ങി എന്നിങ്ങനെ പ്രകൃതിയുടെ ഭാവമാറ്റം മുൻപെങ്ങും കണ്ടിട്ടില്ലാത്ത തരത്തിലേക്ക് മാറിക്കഴിഞ്ഞിട്ടുണ്ട്. ഏറ്റവും ജനസംഖ്യയുള്ള 100 നഗരങ്ങളിലും തിരഞ്ഞെടുത്ത 12 നഗരങ്ങളിലും നടത്തിയ അവലോകനത്തിന്റെ അടിസ്ഥാനത്തിൽ 95% നഗരങ്ങളും അതിശൈത്യമോ വരണ്ടതോ ആയ കാലാവസ്ഥയിലേക്ക് മാറുകയാണ് എന്ന് കണ്ടെത്തിക്കഴിഞ്ഞു.