മണിപ്പൂര് വീണ്ടും അശാന്തിയിലേക്ക്: ഉഖ്റുല് ജില്ലയില് അഞ്ച് ദിവസത്തേക്ക് കര്ഫ്യൂ; ഇന്റര്നെറ്റ് സേവനങ്ങള് നിര്ത്തിവെച്ചു
ഇംഫാല്: അക്രമങ്ങള് ആവര്ത്തിക്കുന്ന സാഹചര്യത്തില് മണിപ്പൂരിലെ ഉഖ്റുല് ജില്ലയില് അഞ്ച് ദിവസത്തേക്ക് കര്ഫ്യൂ ഏര്പ്പെടുത്തുകയും ഇന്റര്നെറ്റ് സേവനങ്ങള് നിര്ത്തി വെക്കുകയും ചെയ്തു.
ആയുധധാരികളായ അക്രമികള് വീടുകള്ക്ക് തീയിട്ടതു മൂലം ഗ്രാമവാസികള് രാത്രിയോടെ പലായനം ചെയ്യാന് തുടങ്ങിയതോടെയാണ് സുരക്ഷാ നിയന്ത്രണങ്ങള് ഏര്പ്പെടുത്തിയത്.
തിങ്കളാഴ്ച രാത്രി വൈകിയാണ് ജില്ലയില് വീണ്ടും അക്രമങ്ങള് ആരംഭിച്ചത്. അക്രമികള് ലിത്തന് സരെയ്ഖോങ് ഗ്രാമത്തിലെ വീടുകള്ക്ക് തീയിടുകയും ആകാശത്തേക്ക് വെടിയുതിര്ക്കുകയും ചെയ്തു.
ഇതോടെ ഗ്രാമവാസികള് പരിഭ്രാന്തരായി. കൂടുതല് അക്രമങ്ങള് ഉണ്ടാകുമെന്ന് ഭയന്ന് പലരും അയല് ജില്ലയായ കാങ്പോക്പിയിലെ സുരക്ഷിതമായ സ്ഥലങ്ങളിലേക്ക് പലായനം ചെയ്തു.
ടാങ്ഖുള് ഗ്രാമത്തിലെ ജനങ്ങളും ഈ പ്രദേശങ്ങള് വിട്ടുപോയതായി റിപ്പോര്ട്ടുണ്ട്. അഗ്നിബാധയെ തുടര്ന്ന് ഉഖ്റുല് ജില്ലയുടെ ചില ഭാഗങ്ങളില് കര്ഫ്യൂ ഏര്പ്പെടുത്തിയിരുന്നു. കൂടുതല് അനിഷ്ടസംഭവങ്ങള് ഒഴിവാക്കുന്നതിനായി സുരക്ഷാ സംവിധാനങ്ങള് ശക്തമാക്കിയിട്ടുണ്ട്
