നീറ്റ് ക്രമക്കേട്: വിദ്യാര്ഥികള്ക്ക് നേരെ പൊലീസ് അതിക്രമം
തിരുവനന്തപുരം: നീറ്റ് പരീക്ഷാ തിരിമറിക്കെതിരായ പ്രതിഷേധ പ്രകടനങ്ങള്ക്ക് നേരെ ഉണ്ടായ പൊലീസ് അതിക്രമത്തിലും പ്രതിപക്ഷ നേതാവ് രാഹുല് ഗാന്ധി ഉള്പ്പെടെയുള്ള ജനപ്രതിനിധികളെ കയ്യേറ്റം ചെയ്തതിലും പ്രതിഷേധിച്ച് ഇന്ന് സംസ്ഥാന വ്യാപകമായി വിദ്യാഭ്യാസ ബന്ദ് ആചരിക്കാന് കെ.എസ്.യു.
വിദ്യാര്ഥി വിരുദ്ധ നടപടികളിലും പ്രതിഷേധക്കാര്ക്ക് നേരെയുണ്ടായ ക്രൂരമായ മര്ദനത്തിലും പ്രതിഷേധിച്ചാണ് പഠിപ്പ് മുടക്കല് സമരത്തിന് ആഹ്വാനം നല്കിയിരിക്കുന്നതെന്ന് കെ.എസ്.യു സംസ്ഥാന പ്രസിഡന്റ് അലോഷ്യസ് സേവ്യര് അറിയിച്ചു.
പ്രതിഷേധത്തിന്റെ ഭാഗമായി ഇന്ന് സംസ്ഥാനത്തെ മുഴുവന് ക്യാമ്പസുകളിലും പഠിപ്പുമുടക്കി പ്രധാനമന്ത്രി നരേന്ദ്ര മോഡിയുടെ കോലം കത്തിക്കാന് സംഘടന ആഹ്വാനം ചെയ്തിട്ടുണ്ട്. കൂടാതെ എല്ലാ ജില്ലാ കേന്ദ്രങ്ങളിലും ശക്തമായ പ്രതിഷേധ പ്രകടനങ്ങള് സംഘടിപ്പിക്കുമെന്നും നീറ്റ് വിഷയത്തില് അര്ഹമായ നീതി ഉറപ്പാക്കും വരെ പോരാട്ടം തുടരുമെന്നും നേതൃത്വം വ്യക്തമാക്കി
