പ്രായമായ ജീവനക്കാർക്ക് സ്വമേധയാ നേരത്തേ പിരിഞ്ഞുപോകാൻ അവസരം ഒരുക്കി മൈക്രോസോഫ്റ്റ്
മെറ്റ ഉൾപ്പെടെയുള്ള പല കമ്പനികളും ജീവനക്കാരുടെ കൂട്ടപ്പിരിച്ചുവിടൽ പ്രഖ്യാപിക്കുമ്പോൾ വ്യത്യസ്തമായൊരു വഴി സ്വീകരിക്കുകയാണ് മൈക്രോസോഫ്റ്റ്. യു.എസിലെ പ്രായമായ ജീവനക്കാർക്ക് സ്വമേധയാ നേരത്തേ പിരിഞ്ഞുപോകാൻ അവസരം ഒരുക്കുകയാണ് കമ്പനി. നിർമിതബുദ്ധി (എ.ഐ.) അധിഷ്ഠിത മാറ്റങ്ങൾക്കും അംഗബലം കുറയ്ക്കുന്നതിനും ലക്ഷ്യമിട്ടാണ് ഇങ്ങനെയൊരു നീക്കം.
കമ്പനി ആദ്യമായാണ് ഇങ്ങനെയൊരു വൺ ടൈം റിട്ടയർമെന്റ് പ്രോഗ്രാം പ്രഖ്യാപിച്ചത്. 70 വയസ്സോ അതിൽ കൂടുതലോ പ്രായമുള്ള ജീവനക്കാർക്കാണ് ഈ സൗകര്യം ലഭിക്കുക. സീനിയർ ഡയറക്ടർ തലത്തിലുള്ളവർക്കും അതിനു താഴെയുള്ളവർക്കും ഈ അവസരം സ്വീകരിക്കാം. മേയ് ഏഴിന് വൺ ടൈം റിട്ടയർമെന്റ് പ്രോഗ്രാമിന് യോഗ്യരായ ജീവനക്കാർക്ക് കമ്പനി അറിയിപ്പു നൽകും. യു.എസിലെ ഏഴ് ശതമാനത്തോളം ജീവനക്കാരെയാണ് ഈ നീക്കം ബാധിക്കുക എന്നാണ് വിവരം.
കഴിഞ്ഞ ഒരു വർഷത്തിനിടെ, തൊഴിൽമേഖലയിലും സാങ്കേതിക വ്യവസായരംഗത്തും നിർമിതബുദ്ധി (എ.ഐ.) ചെലുത്തിയ സ്വാധീനത്തെത്തുടർന്ന് പ്രമുഖ ടെക് കമ്പനികൾ വൻതോതിൽ ജീവനക്കാരെ വെട്ടിക്കുറച്ചുവരികയാണ്. കൂടുതൽ കാര്യക്ഷമമായി പ്രവർത്തിക്കാനും മറ്റ് നിക്ഷേപങ്ങൾക്കായി പണം കണ്ടെത്താനുമായി തങ്ങളുടെ 10 ശതമാനം ജീവനക്കാരെ അഥവാ ഏകദേശം 8,000 പേരെ പിരിച്ചുവിടുമെന്ന് മെറ്റ വ്യാഴാഴ്ച അറിയിച്ചു. ജനുവരിയിലും ഒക്ടോബറിലും രണ്ട് ഘട്ടങ്ങളിലായി ആമസോൺ 30,000 പേരെയാണ് പിരിച്ചുവിട്ടത്.
