അന്താരാഷ്ട്ര വിദ്യാർത്ഥികൾക്ക് തിരിച്ചടി; സ്റ്റഡി പെർമിറ്റ് നിയമങ്ങളിൽ കർശന മാറ്റങ്ങളുമായികാനഡ

ഓട്ടവ:കാനഡയിൽ പഠിക്കുന്ന അന്താരാഷ്ട്ര വിദ്യാർത്ഥികൾക്ക് നിർണായക മുന്നറിയിപ്പുമായി ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC). സ്റ്റഡി പെർമിറ്റ് നിബന്ധനകളിൽ വരുത്തിയ പുതിയ മാറ്റങ്ങൾ കർശനമായി പാലിക്കാത്ത വിദ്യാർത്ഥികൾക്ക് സ്റ്റഡി പെർമിറ്റ് അസാധുവാകാനും തുടർപഠനത്തെയും ഭാവിയിലെ ഇമിഗ്രേഷൻ സാധ്യതകളെയും ബാധിക്കാനും സാധ്യതയുണ്ടെന്ന് അധികൃതർ വ്യക്തമാക്കി.

പുതിയ മാർഗനിർദേശങ്ങൾ പ്രകാരം, ഇനി മുതൽ സ്റ്റഡി പെർമിറ്റിൽ പേര് രേഖപ്പെടുത്തിയ കോളേജ് (DLI) മാറി മറ്റൊരു കോളേജിലേക്കോ സർവകലാശാലയിലേക്കോ മാറാൻ ആഗ്രഹിക്കുന്ന വിദ്യാർത്ഥികൾ ഇനി പുതിയ സ്റ്റഡി പെർമിറ്റിനായി അപേക്ഷിക്കേണ്ടതാണ്. മുൻപ് നിലവിലുണ്ടായിരുന്ന ലളിതമായ ഓൺലൈൻ DLI ട്രാൻസ്ഫർ സംവിധാനം അവസാനിപ്പിച്ചതായി IRCC വ്യക്തമാക്കുന്നു. അനുമതിയില്ലാതെ സ്ഥാപനം മാറുന്നവർ സ്റ്റഡി പെർമിറ്റിന്റെ വ്യവസ്ഥകൾ ലംഘിക്കുന്നവരായി കണക്കാക്കപ്പെടും.

കോഴ്‌സ് മാറ്റങ്ങൾക്കും പുതിയ നിയന്ത്രണങ്ങൾ ബാധകമാണ്. ഒരേ വിദ്യാഭ്യാസ നിലവാരത്തിലുള്ള (ഉദാഹരണത്തിന് ഡിപ്ലോമയിൽ നിന്ന് മറ്റൊരു ഡിപ്ലോമയിലേക്ക്) കോഴ്‌സുകളിലേക്ക് മാറുന്നത് എളുപ്പമായിരിക്കുമ്പോൾ, പഠനനിലവാരം മാറുന്ന സാഹചര്യങ്ങളിൽ പുതിയ സ്റ്റഡി പെർമിറ്റ് ആവശ്യമായി വരാം.