
ഖത്തർ സമ്മാനിച്ച എയർഫോഴ്സ് വൺ റെക്കോർഡിട്ടു; ചൈനയിൽ നിന്ന് അമേരിക്കയിലേക്ക് 14 മണിക്കൂറിലേറെ നിർത്താതെ പറന്നു
വാഷിങ്ടൺ ∙ ഖത്തർ സമ്മാനിച്ച ബോയിങ് 747-8i വിമാനത്തിൽ പ്രസിഡന്റ് ഡോണൾഡ്
ട്രംപ് ചൈനയിലെ ഷെൻഷെനിൽ നിന്ന് അമേരിക്കയിലെ മേരിലാൻഡിലേക്ക് നിർത്താതെ
പറന്നു. 14 മണിക്കൂറും 7 മിനിറ്റും നീണ്ട ഈ യാത്ര എയർഫോഴ്സ് വണ്ണിന്റെ
ചരിത്രത്തിലെ ഏറ്റവും ദൈർഘ്യമേറിയ നോൺസ്റ്റോപ്പ് പറക്കലായി.
നവംബർ 19 വ്യാഴാഴ്ച ഷെൻഷെനിൽ നിന്ന് പ്രാദേശിക സമയം വൈകിട്ട് 6.54ന്
പുറപ്പെട്ട വിമാനം യുഎസ് ഈസ്റ്റേൺ സമയം രാത്രി 8.01ന് മേരിലാൻഡിലെ
ജോയിന്റ് ബേസ് ആൻഡ്രൂസിൽ ഇറങ്ങി. മടക്കയാത്രയിൽ ഇന്ധനം നിറയ്ക്കാൻ വിമാനം
ഇടയ്ക്ക് എവിടെയും ഇറങ്ങിയില്ല. എന്നാൽ തിങ്കളാഴ്ച ഏഷ്യയിലേക്കുള്ള
യാത്രയിൽ അലാസ്കയിലെ ഫെയർബാങ്ക്സിൽ ഇന്ധനം നിറയ്ക്കാൻ ഒന്നര മണിക്കൂറോളം
നിർത്തിയിരുന്നു.
ഷാങ്ഹായ്, ടോക്കിയോ, അലാസ്കയിലെ ഷെമ്യ, കാനഡയിലെ വിന്നിപെഗ്, ഒഹായോയിലെ
ക്ലീവ്ലാൻഡ് എന്നിവയ്ക്ക് മുകളിലൂടെയായിരുന്നു മടക്കയാത്ര. 33,000 അടി
ഉയരത്തിൽ മണിക്കൂറിൽ ഏകദേശം 575 മൈൽ ശരാശരി വേഗത്തിലായിരുന്നു പറക്കൽ.
ഷെൻഷെനിൽ നിന്ന് പുറപ്പെടുമ്പോൾ വിമാനത്തിന്റെ ഭാരം 10 ലക്ഷം പൗണ്ടിന്
തൊട്ടുതാഴെയായിരുന്നു. യുഎസ് വ്യോമസേനയുടെ ചരിത്രത്തിലെ ഏറ്റവും ഭാരമേറിയ
ടേക്ക് ഓഫും ഇതായിരുന്നു.
