വിദേശ രാജ്യങ്ങളില്‍ കൊവിഡ് ബാധിച്ച്‌ ഏറ്റവും കൂടുതല്‍ ഇന്ത്യക്കാര്‍ മരിച്ചത് സൗദിയില്‍.
റിയാദ്: വിദേശ രാജ്യങ്ങളില്‍ കൊവിഡ് ബാധിച്ച്‌ ഏറ്റവും കൂടുതല്‍ ഇന്ത്യക്കാര്‍ മരിച്ചത് സൗദിയില്‍. കേന്ദ്ര സര്‍ക്കാര്‍ രാജ്യസഭയില്‍ നല്‍കിയ കണക്കാണിത്. വിദേശ രാജ്യങ്ങളില്‍ ഇതുവരെ റിപ്പോര്‍ട്ട് ചെയ്യപ്പെട്ട 3570 ഇന്ത്യക്കാരുടെ കൊവിഡ് മരണങ്ങളില്‍ 1154 എണ്ണവും റിപ്പോര്‍ട്ട് ചെയ്യപ്പെട്ടത് സൗദിയിലാണെന്ന് കേന്ദ്ര വിദേശകാര്യ സഹമന്ത്രി വി മുരളീധരന്‍ വ്യക്തമാക്കി.
കേരളഓണ്‍ലൈന്‍ ന്യൂസ് യൂട്യൂബ് ചാനല്‍ സബ്‌സ്‌ക്രൈബ് ചെയ്യാം
894 പേര്‍ മരണപ്പെട്ട യുഎഇയിലാണ് ഇന്ത്യക്കാരുടെ കൊവിഡ് മരണങ്ങളില്‍ രണ്ടാമത്. കുവൈറ്റില്‍ 546ഉം ഒമാനില്‍ 384ഉം ഖത്തറില്‍ 106ഉം ഇന്ത്യക്കാരാണ് കൊവിഡ് ബാധിച്ച്‌ മരിച്ചത്. ഇതിനകം 70 വിദേശ രാജ്യങ്ങളിലെ ഇന്ത്യക്കാര്‍ കൊവിഡ് ബാധിച്ച്‌ മരണപ്പെട്ടതായും മന്ത്രി വ്യക്തമാക്കി. ഇവിടങ്ങളില്‍ നിന്നുള്ള ഇന്ത്യന്‍ എംബസികളും കോണ്‍സുലേറ്റുകളും നല്‍കിയ കണക്കുകളുടെ അടിസ്ഥാനത്തിലാണിത്.
മരണപ്പെട്ടവരുടെ മൃതദേഹങ്ങള്‍ കുടുംബക്കാരുടെ താല്‍പര്യപ്രകാരം വിദേശരാജ്യങ്ങളില്‍ തന്നെ സംസ്‌ക്കരിക്കുകയോ ഇന്ത്യയിലേക്ക് എത്തിക്കുകയോ ചെയ്യുന്നതിനുള്ള സഹായങ്ങള്‍ അതത് രാജ്യങ്ങളിലെ ഇന്ത്യന്‍ എംബസികളും കോണ്‍സുലേറ്റുകളും ചെയ്തതായും മന്ത്രി അറിയിച്ചു. ഇതുമായി ബന്ധപ്പെട്ട് രാജ്യസഭയില്‍ ഉയര്‍ന്ന ചോദ്യത്തിന് മറുപടി പറയുകയായിരുന്നു മന്ത്രി.
