ഡൽഹിക്ക് പുറത്തെ ആദ്യ ആപ്പ് മുഖ്യമന്ത്രി; പഞ്ചാബിൽ ഭഗവന്ത് മൻ ഇന്ന് അധികാരമേൽക്കും

ഡൽഹിക്ക് പുറത്തെ ആം ആദ്മി പാർട്ടിയുടെ ആദ്യ മുഖ്യമന്ത്രിയായി പഞ്ചാബിൽ ഭഗവന്ത് മൻ ഇന്ന് അധികാരമേൽക്കും. നാല് ലക്ഷത്തിലേറെ പേർ സത്യപ്രതിജ്ഞാ ചടങ്ങിൽ പങ്കെടുക്കുമെന്നാണ് പ്രതീക്ഷിക്കുന്നത്. ഡൽഹി മുഖ്യമന്ത്രിയും ആംആദ്മി പാർട്ടി കൺവീനറുമായ അരവിന്ദ് കെജ്‌രിവാളും ചടങ്ങിൽ പങ്കെടുക്കും. കേന്ദ്ര മന്ത്രിമാരെയും സ്ഥാനമൊഴിയുന്ന കോൺഗ്രസ് മന്ത്രിമാർ ഉൾപ്പെടെയുള്ളവരെയും ചടങ്ങിൽനിന്ന് ആപ്പ് ഒഴിവാക്കിയിട്ടുണ്ട്. അമ്പത് ഏക്കറിലാണ് സത്യപ്രതിജ്ഞയ്ക്കായുളള പന്തൽ. വൻ ഭൂരിപക്ഷം നേടിയാണ് ആം ആദ്മി പാർട്ടി പഞ്ചാബിൽ അധികാരമേൽക്കുന്നത്.