ബെഥേൽ ഫെലോഷിപ്പ് ആത്മീക സംഗമം ഇന്നു മുതൽ

ജയ്പൂർ: ഉത്തരേന്ത്യൻ മിഷൻ പ്രവർത്തനങ്ങളിൽ പങ്കാളിത്തം വഹിക്കുന്ന ബഥേൽ ഫെല്ലോഷിപ്പിൻ്റെ വാർഷിക ആത്മീക സമ്മേളനം ഒക്ടോ. 30 മുതൽ നവം. 3 വരെ മാൻസരോവർ ചോപ്ര റോയൽ പാലസിൽ നടക്കും. വടക്കേ ഇന്ത്യൻ മിഷണറിയും പ്രശസ്ത സുവിശേഷ പ്രസംഗകനുമായ പാസ്റ്റർ വൈ യോഹന്നാൻ നേതൃത്വം കൊടുക്കുന്ന പ്രസ്ഥാനമാണ് ബെഥേൽ ഫെല്ലോഷിപ്പ്.

ബൈബിൾ ക്ലാസ്സോടെ സമ്മേളനം ആരംഭിക്കും. വൈകുന്നേരം 6 ന് ബെഥേൽ ഫെല്ലോഷിപ്പ് വൈസ് പ്രസിഡന്റ് പാസ്റ്റർ അനു സി സാമുവലിന്റെ അദ്ധ്യക്ഷതയിൽ കൂടുന്ന പൊതുസമ്മേളനത്തിൽ ജനറൽ സെക്രട്ടറി പാസ്റ്റർ ടോം തോമസ് സങ്കീർത്തനം വായിക്കുകയും പ്രസിഡന്റ് പാസ്റ്റർ വൈ യോഹന്നാൻ  ഉത്‌ഘാടനം നിർവ്വഹിക്കുകയും ചെയ്യും. ഡോ.ജിബി റാഫേൽ, പാസ്റ്റർ പോൾ മാത്യു (ഉദയ്പൂർ) എന്നിവരാണ് ഇന്നത്തെ മുഖ്യ പ്രസംഗകർ.

ക്രൈസ്തവ സംഗീതലോകത്തു ശക്തമായി ഉപയോഗിക്കപ്പെടുന്ന പാസ്റ്റർ സണ്ണി വിശ്വാസ്, പാസ്റ്റർ സുജിത് എം സുനിൽ, സുവി. മോസസ് സാമുവേൽ എന്നിവർ ആരാധനയ്ക്കു നേതൃത്വം നല്കും.

വരും ദിവസങ്ങളിൽ രാവിലെ 9 മുതൽ രാത്രി 9 വരെ ബൈബിൾ ക്ലാസ്, യുവജനങ്ങൾക്കായി പ്രത്യേക സമ്മേളനങ്ങൾ, പ്രാർത്ഥനായോഗങ്ങൾ, വൈകുന്നേരം പൊതു സമ്മേളനം, നവംബർ 2 ശനിയാഴ്ച രാവിലെ ഓർഡിനേഷൻ ശുശ്രൂഷ, ഉച്ചകഴിഞ്ഞു രാജസ്ഥാൻ ബൈബിൾ ട്രെയിനിംഗ് സെൻ്ററിൻ്റെ 17-ാമത് ബിരുദദാന ശുശ്രൂഷ എന്നിങ്ങനെ ദൈവജനങ്ങളുടെ ആത്മീക പരിപോഷണത്തിനുതകുന്ന വിവിധ ശുശ്രൂഷകളാണ് പദ്ധതിയിട്ടിരിക്കുന്നത്.

നവംബർ മൂന്നിന് രാവിലെ എട്ടിന് ആരംഭിക്കുന്ന സഭായോഗത്തിനു പാസ്റ്റർ ടോം തോമസ് നേതൃത്വം നൽകും. പാസ്റ്റർ കെ ജെ കുര്യാക്കോസ്, പാസ്റ്റർ കെ സി തോമസ് (ഐപിസി കേരള സ്റ്റേറ്റ് പ്രസിഡൻ്റ്) എന്നിവർ മുഖ്യ സന്ദേശം നൽകും. പാസ്റ്റർ വൈ.യോഹന്നാൻ നേതൃത്വം വഹിക്കുന്ന തിരുവത്താഴ ശുശ്രൂഷയോടെ 2024-ലെ സമ്മേളനത്തിനു സമാപനമാകും.