ഇന്ത്യയിലെ ആദ്യ ഡെങ്കിപ്പനി വാക്സിൻ 2027 ആദ്യപകുതിയിൽ ലഭ്യമായേക്കും
ന്യൂഡൽഹി: ഇന്ത്യയിൽ ആദ്യമായി അംഗീകാരം ലഭിച്ച ഡെങ്കിപ്പനി വാക്സിൻ QDENGA 2027ന്റെ ആദ്യപകുതിയിൽ സ്വകാര്യ വിപണിയിൽ ലഭ്യമായേക്കും. ജപ്പാൻ ആസ്ഥാനമായ Takeda Pharmaceutical Companyയും ഇന്ത്യയിലെ Dr. Reddy’s Laboratoriesയും തമ്മിൽ ഇതുസംബന്ധിച്ച് വിതരണ കരാറിൽ ഏർപ്പെട്ടതോടെയാണ് വാക്സിൻ രാജ്യത്ത് ലഭ്യമാക്കാനുള്ള നടപടികൾക്ക് വേഗം കൂടിയത്. പ്രാദേശിക അധികാരികളുമായി ബന്ധപ്പെട്ട നടപടിക്രമങ്ങൾ പൂർത്തിയാകുന്നതിന് വിധേയമായാണ് 2027ന്റെ ആദ്യപകുതിയിൽ വാക്സിൻ ലഭ്യമാകുമെന്ന് കമ്പനികൾ അറിയിച്ചിരിക്കുന്നത്.
Takeda വികസിപ്പിച്ച QDENGAയ്ക്ക് ഇന്ത്യയിൽ വിപണന അനുമതി കേന്ദ്ര ഡ്രഗ്സ് സ്റ്റാൻഡേർഡ് കൺട്രോൾ ഓർഗനൈസേഷൻ (CDSCO) 2026 ജൂലൈയിൽ നൽകിയിരുന്നു. 4 മുതൽ 60 വയസ്സ് വരെയുള്ളവരിൽ ഡെങ്കിപ്പനി പ്രതിരോധിക്കുന്നതിനാണ് അനുമതി നൽകിയിരിക്കുന്നത്. രാജ്യത്ത് ഡെങ്കിപ്പനി പ്രതിരോധത്തിനായി അംഗീകാരം ലഭിക്കുന്ന ആദ്യ വാക്സിനാണിതെന്ന് കേന്ദ്ര ആരോഗ്യ-കുടുംബക്ഷേമ മന്ത്രാലയം വ്യക്തമാക്കിയിട്ടുണ്ട്.
QDENGAയുടെ ഇന്ത്യയിലെ സ്വകാര്യ വിപണിയിലെ പ്രചാരണവും വിതരണവും Dr. Reddy’s Laboratories ആയിരിക്കും നിർവഹിക്കുക. കുട്ടികൾക്കും മുതിർന്നവർക്കും വാക്സിൻ ലഭ്യമാക്കുന്നതിനായാണ് കമ്പനികൾ തമ്മിലുള്ള സഹകരണം. വാക്സിന്റെ വില സംബന്ധിച്ച അന്തിമ വിവരങ്ങൾ ഇതുവരെ പുറത്തുവിട്ടിട്ടില്ല.
