അമേരിക്കൻ തലസ്ഥാനത്ത് വെടിവെപ്പ്; ഒരാൾ കൊല്ലപ്പെട്ടു, നാലുപേർക്ക് പരിക്ക്
വാഷിങ്ടൺ : അമേരിക്കൻ തലസ്ഥാനമായ വാഷിങ്ടൺ ഡിസിയിലെ ലോഗൻ സർക്കിൾ പ്രദേശത്തുണ്ടായ വെടിവെപ്പിൽ ഒരാൾ കൊല്ലപ്പെടുകയും നാലുപേർക്ക് പരിക്കേൽക്കുകയും ചെയ്തതായി റിപ്പോർട്ട്. ആക്രമണത്തിന് ഉത്തരവാദിയെന്ന് സംശയിക്കുന്ന വ്യക്തിയെയും പിന്നീട് മരിച്ച നിലയിൽ കണ്ടെത്തി.
വൈറ്റ് ഹൗസിൽനിന്ന് ഏകദേശം ഒരു മൈൽ അകലെയുള്ള തിരക്കേറിയ പ്രദേശത്താണ് സംഭവം നടന്നത്. സമീപത്തെ വ്യാപാരസ്ഥാപനങ്ങളും താമസകെട്ടിടങ്ങളും ഉൾപ്പെടുന്ന ജനസാന്ദ്രതയേറിയ മേഖലയിൽ വെടിവെപ്പ് ഉണ്ടായത് പ്രദേശവാസികൾക്കിടയിൽ ആശങ്ക സൃഷ്ടിച്ചു.
പ്രാഥമിക റിപ്പോർട്ടുകൾ പ്രകാരം, വ്യാഴാഴ്ച രാവിലെ എട്ടുമണിയോടെയാണ് ലോഗൻ സർക്കിളിന് സമീപമുള്ള VIDA Fitness ജിമ്മിൽ വെടിവെപ്പ് ആരംഭിച്ചത്. ജിമ്മിനുള്ളിൽ ഒരാളെ വെടിവെച്ചുകൊന്നശേഷം അക്രമി സമീപപ്രദേശത്തുണ്ടായിരുന്ന മറ്റ് നാലുപേർക്കുനേരെയും വെടിയുതിർത്തതായി പൊലീസ് അറിയിച്ചു.
പരിക്കേറ്റവരെ അടിയന്തര ചികിത്സയ്ക്കായി ആശുപത്രികളിലേക്ക് മാറ്റി. ഇവരിൽ ഒരാളുടെ നില ഗുരുതരമാണെന്നാണ് പ്രാഥമിക വിവരം.
വെടിവെപ്പിനുശേഷം അക്രമി സമീപത്തെ അപ്പാർട്ട്മെന്റ് കെട്ടിടത്തിലേക്ക് കടന്നതോടെ പൊലീസ് പ്രദേശം വളഞ്ഞു. പ്രത്യേക പരിശീലനം ലഭിച്ച സായുധ പൊലീസ് സംഘവും സ്ഥലത്തെത്തി.
കെട്ടിടത്തിന്റെ ഏഴാം നിലയിലുള്ള താമസസ്ഥലത്താണ് അക്രമി ഒളിച്ചിരുന്നതെന്ന് അന്വേഷണ ഉദ്യോഗസ്ഥർ കണ്ടെത്തി. തുടർന്ന് പൊലീസ് ഫോണിലൂടെ ഇയാളുമായി ബന്ധപ്പെടാനും കീഴടങ്ങാൻ പ്രേരിപ്പിക്കാനും ശ്രമിച്ചു.
ചർച്ചകൾ പുരോഗമിക്കുന്നതിനിടെ കെട്ടിടത്തിനുള്ളിൽനിന്ന് വെടിയൊച്ച കേട്ടതായി റിപ്പോർട്ടുകളുണ്ട്. തുടർന്ന് അകത്തുകയറിയ ഉദ്യോഗസ്ഥർ അക്രമിയെ വെടിയേറ്റ് മരിച്ച നിലയിൽ കണ്ടെത്തി.
സ്വയം വെടിവെച്ചാണ് ഇയാൾ മരിച്ചതെന്നാണ് പൊലീസിന്റെ പ്രാഥമിക നിഗമനം. എന്നാൽ മരണത്തിന്റെ കൃത്യമായ സാഹചര്യം സംബന്ധിച്ച അന്വേഷണം തുടരുകയാണ്.
സംഭവത്തെത്തുടർന്ന് ലോഗൻ സർക്കിളിന് സമീപമുള്ള നിരവധി റോഡുകൾ താൽക്കാലികമായി അടച്ചു. സമീപത്തെ സ്കൂളുകളിലും സ്ഥാപനങ്ങളിലും സുരക്ഷാ നിയന്ത്രണങ്ങൾ ഏർപ്പെടുത്തി.
