വീട്ടിനുള്ളിൽ ഉറങ്ങിക്കിടന്ന ഒരു കുടുംബത്തിലെ അഞ്ചുകുട്ടികൾ മരിച്ചനിലയിൽ, രണ്ടുപേർക്ക് ഗുരുതരം
ലക്‌നൗ: മുറിയിൽ ഉറങ്ങിക്കിടന്ന അഞ്ചുകുട്ടികൾ ശ്വാസംമുട്ടി മരിച്ചു. ഉത്തർപ്രദേശിലെ അംരോഹ ജില്ലയിലെ വീട്ടിലായിരുന്നു ദുരന്തം. മരിച്ചവരെല്ലാം ഒരു കുടുംബത്തിലെ അംഗങ്ങളാണെന്നാണ് റിപ്പോർട്ട്. ഗുരുതരാവസ്ഥയിലായ രണ്ടുപേരെ ആശുപത്രിയിലേക്ക് മാറ്റി.റഹീസുദ്ദീൻ എന്നയാളുടെ മൂന്ന് കുട്ടികളും ഇയാളുടെ ബന്ധുവിന്റെ രണ്ട് കുട്ടികളുമാണ് മരിച്ചത്. റഹീസുദ്ദീന്റെ ഭാര്യയും സഹോദരിയുമാണ് ഗുരുതരാവസ്ഥയിലുള്ളത്.
അടച്ചിട്ട മുറിക്കുള്ളിൽ കത്തിച്ചുവച്ചിരുന്ന കൽക്കരി അടുപ്പിലെ പുക ശ്വസിച്ചതാണ് ദുരന്തത്തിനിടയാക്കിയത്. മുറിയിൽ ഓക്സിജൻ കുറഞ്ഞതും ദുരന്തത്തിന്റെ ആക്കംകൂട്ടി. തിങ്കളാഴ്ച രാത്രിയോടെ ഒരുമുറിയിൽ ഉറങ്ങാൻപോയ ഏഴുപേർ പിറ്റേന്ന് വൈകുന്നേരമായിട്ടും വാതിൽ തുറക്കാതായതോടെ അയൽവാസികൾക്ക് സംശയമായി. തുടർന്ന് ബലംപ്രയോഗിച്ച് വാതിൽ തുറന്നതോടെയാണ് ഏഴുപേരെയും അവശനിലയിൽ കണ്ടെത്തിയത്. ആശുപത്രിയിൽ എത്തിച്ചെങ്കിലും അഞ്ചുപേരും അപ്പോഴേക്കും മരിച്ചിരുന്നു. സംഭവത്തെക്കുറിച്ച് കൂടുതൽ അന്വേഷണം ആരംഭിച്ചു.
