സ്കൂള് കായിക മേള സമാപന സമ്മേളനത്തില് വിദ്യാഭ്യാസ മന്ത്രിയെ അഭിനന്ദിച്ച് ഗവര്ണർ
തിരുവനന്തപുരം: സ്കൂള് കായിക മേളയുടെ സമാപന സമ്മേളനത്തില് വിദ്യാഭ്യാസ മന്ത്രി വി. ശിവന്കുട്ടിയെ അഭിനന്ദിച്ച് ഗവര്ണര് രാജേന്ദ്ര ആര്ലേക്കര്. കായിക മേളയുടെ നടത്തിപ്പ് പരാമര്ശിച്ചായിരുന്നു ഗവര്ണറുടെ അഭിനന്ദനം. നേരത്തെ സ്പോര്ട്സ് എക്സ്ട്രാ കരികുലം ആയിരുന്നു. ഇന്ന് സ്പോര്ട്സ് വിദ്യാഭ്യാസത്തിന്റെ ഭാഗമാണെന്നും അദ്ദേഹം പറഞ്ഞു.
”എങ്ങനെ ഒരു പ്രോഗ്രാം നടത്താം എന്ന് ശിവന്കുട്ടി കാണിച്ചു തന്നു. 20,000 കുട്ടികളാണ് കായിക മേളയില് പങ്കെടുത്തത്. ഇത് വലിയൊരു പരിപാടിയാണ്. ഇതിന്റെ ഭാഗമായ എല്ലാവര്ക്കും അഭിനന്ദനം.” – ഗവര്ണര് പറഞ്ഞു.
അര്ഹരായ കുട്ടികള്ക്ക് വീട് വച്ചു കൊടുക്കാനുള്ള വിദ്യാഭ്യാസ വകുപ്പിന്റെ പദ്ധതിയേയും ഗവര്ണര് അഭിനന്ദിച്ചു. ഈ തീരുമാനം എടുത്തവര്ക്ക് അഭിനന്ദനമറിയിച്ച അദ്ദേഹം ഇത്ര മനോഹരമായ സംസ്ഥാനത്തിന്റെ ഗവര്ണര് ആയതില് സന്തോഷമുണ്ടെന്നും കൂട്ടിച്ചേര്ത്തു.
