യുഎന് കാലാവസ്ഥാ ഉച്ചകോടി (സിഒപി 30) നടക്കുന്ന ബ്രസീലിലെ ബെലേമിലെ വേദിയില് വന് തീപിടുത്തം
റിയോഡി ജനീറോ: യുഎന് കാലാവസ്ഥാ ഉച്ചകോടി (സിഒപി 30) നടക്കുന്ന ബ്രസീലിലെ ബെലേമിലെ വേദിയില് വന് തീപിടുത്തം. യു.എന് സെക്രട്ടറി ജനറല് അന്റോണിയോ ഗുട്ടെറസ് ഉള്പ്പെടെ ആയിരത്തിലേറെ പ്രതിനിധികളെ വേദിയില് നിന്നും ഒഴിപ്പിച്ചു. കേന്ദ്ര പരിസ്ഥിതി മന്ത്രി ഭൂപേന്ദര് യാദവും മറ്റ് ഉദ്യോഗസ്ഥരും സുരക്ഷിതരാണെന്ന് സുരക്ഷാ ഉദ്യോഗസ്ഥര് അറിയിച്ചു.
കനത്ത പുക പടര്ന്നതിനെ തുടര്ന്ന് 13 പേര്ക്ക് ഉച്ചകോടി നടക്കുന്ന സ്ഥലത്ത് ചികിത്സ നല്കിയതായി സംഘാടകര് അറിയിച്ചു. തീ നിയന്ത്രണവിധേയമാക്കിയെന്നും സംഭവത്തില് ആര്ക്കും പരിക്കില്ലെന്നും ബ്രസീല് ടൂറിസം മന്ത്രി സെല്സോ സാബിനോ അറിയിച്ചു.
കല്ക്കരി ഇന്ധനം, കാലാവസ്ഥാ ധന സഹായം, വ്യാപാര നടപടികള് എന്നിവയിലെ സ്തംഭനാവസ്ഥ ഭേദിക്കാനുള്ള ചര്ച്ചകളില് വിവിധ രാജ്യങ്ങളില് നിന്നുള്ള മന്ത്രിമാര് പങ്കെടുക്കുന്നതിനിടെയാണ് സംഭവം. ആരോഗ്യ ശാസ്ത്ര പവലിയനുകളിലാണ് തീപിടുത്തം ഉണ്ടായത്. ആറ് മിനിറ്റിനുള്ളില് അഗ്നിശമന സേനയെത്തി തീ അണച്ചെന്ന് സുരക്ഷാ ഉദ്യോഗസ്ഥര് അറിയിച്ചു
