ഇന്ധന സര്ചാര്ജ് കൂട്ടി എയര് ഇന്ത്യ: ആഭ്യന്തര യാത്രയ്ക്ക് 899 രൂപ വരെ വര്ധന
ന്യൂഡല്ഹി: പശ്ചിമേഷ്യയിലെ യുദ്ധത്തെ തുടര്ന്ന് ആഗോള തലത്തില് വിമാന ഇന്ധനവില കുത്തനെ ഉയര്ന്ന സാഹചര്യത്തില് ആഭ്യന്തര, അന്തര്ദേശീയ റൂട്ടുകളിലെ ഇന്ധന സര്ചാര്ജ് വര്ധിപ്പിച്ച് എയര് ഇന്ത്യ.
മിക്ക റൂട്ടുകളിലും ബുധനാഴ്ച മുതല് മാറ്റം നിലവില് വരും. യൂറോപ്പ്, വടക്കേ അമേരിക്ക, ഓസ്ട്രേലിയ എന്നിവിടങ്ങളിലേക്ക് ഏപ്രില് 10 മുതലായിരിക്കും പുതുക്കിയ സര്ചാര്ജ് ബാധകമാകുക.
വിമാന ഇന്ധന വില വര്ധന 25 ശതമാനമായി പരിമിതപ്പെടുത്തിയ പെട്രോളിയം മന്ത്രാലയത്തിന്റെയും സിവില് ഏവിയേഷന് മന്ത്രാലയത്തിന്റെയും നടപടിക്ക് പിന്നാലെയാണ് ഈ പരിഷ്കരണമെന്ന് എയര് ഇന്ത്യ അറിയിച്ചു.
ആഭ്യന്തര വിമാന സര്വീസുകള്ക്കായി ഫ്ളാറ്റ് സര്ചാര്ജിന് പകരം ദൂരത്തിനനുസരിച്ചുള്ള പ്രത്യേക നിരക്കാണ് എയര് ഇന്ത്യ ഏര്പ്പെടുത്തിയിരിക്കുന്നത്. 500 കിലോ മീറ്റര് വരെയുള്ള ചെറിയ ദൂരങ്ങളില് യാത്ര ചെയ്യുന്നവര് ഒരു സെക്ടറിന് 299 രൂപ അധികമായി നല്കണം. അതേസമയം 2,000 കിലോ മീറ്ററിന് മുകളില് യാത്ര ചെയ്യുന്നവര് 899 രൂപ വരെ അധികമായി നല്കേണ്ടി വരും
