പട്ടിക്ക്​ തീറ്റ കൊടുത്തില്ല; മദ്യലഹരിയിൽ അച്ഛൻ മകനെ കുത്തിക്കൊന്നു

ശ്രീകണ്​ഠപുരം (കണ്ണൂർ): പട്ടിക്ക്​ തീറ്റ കൊടുക്കാത്തതിനെ തുടർന്നുണ്ടായ തർക്കത്തിനിടെ മദ്യലഹരിയിലായ അച്ഛൻ മകനെ കുത്തിക്കൊന്നു. കണ്ണൂർ ജില്ലയിലെ പയ്യാവൂരിലാണ്​ സംഭവം. പയ്യാവൂർ ഉപ്പുപടന്ന സ്വദേശി ഷാരോൺ (19) ആണ് മരിച്ചത്. സംഭവത്തിൽ പിതാവ്​ പേരകത്തിനടിയിൽ സജിയെ പയ്യാവൂർ പൊലീസ് കസ്റ്റഡിയിലെടുത്തു.

ശനിയാഴ്​ച വൈകീട്ട്​ മൂന്നുമണിയോടെ മദ്യപിച്ച്‌ വീട്ടിലെത്തിയ സജി, പട്ടിക്ക്​ തീറ്റ കൊടുക്കാത്തതിനെ ചൊല്ലി മകനുമായി വഴക്കിട്ടിരുന്നു. തുടർന്നാണ്​ ഇയാൾ കത്തികൊണ്ട്​ പുറത്ത്​ കുത്തിയത്​. കുത്തേറ്റ് വീണ ഷാരോണിനെ ആദ്യം പയ്യാവൂരിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും നില ഗുരുതരമായതിനെ തുടർന്ന് കണ്ണൂരിലെ ആശുപത്രിയിലേക്ക് കൊണ്ടുപോകുംവഴി മരണപ്പെടുകയായിരുന്നു.
സജിയുടെ ഭാര്യ ഇറ്റലിയിൽ നഴ്​സാണ്​. രണ്ട്​ മക്കളും സജിയും മാത്രമായിരുന്നു​ വീട്ടിലുണ്ടായിരുന്നത്​.