സംസ്ഥാനത്ത് വേനല്‍ക്കാല ലോഡ് ഷെഡിങ് ഉണ്ടാകില്ല; വൈദ്യുതി മന്ത്രി
പാലക്കാട് : വേനല്‍ കാലം നേരത്തെ എത്തിയെങ്കിലും സംസ്ഥാനം ലോഡ് ഷെഡിങ്ങിലേക്ക് പോകില്ലെന്ന് വൈദ്യുതി മന്ത്രി കെ കൃഷ്ണന്‍കുട്ടി. വൈദ്യുതി ഉപയോഗം ഉയരുന്നത് നേരിടുന്നതിനുള്ള പദ്ധതികള്‍ ആവിഷ്‌കരിച്ചിട്ടുണ്ട്. വൈദ്യുതിയുടെ അമിത ഉപയോഗം സ്വയം നിയന്ത്രിക്കാന്‍ ഉപഭോക്താക്കള്‍ തയ്യാറാകണമെന്നും മന്ത്രി ആവശ്യപ്പെട്ടു.
വേനലില്‍ വൈദ്യുതി ഉപയോഗം ഉയരുമ്പോള്‍ കെ എസ് ഇ ബി പ്രതിസന്ധിയിലാകാറുണ്ട്. എന്നാല്‍ ഇപ്രാവശ്യം ആശങ്കയില്ലെന്നും മന്ത്രി അറിയിച്ചു. പള്ളിവാസല്‍ പദ്ധതിയുടെ പരീക്ഷണ ഘട്ടത്തില്‍ തന്നെ ആറ് കോടിയുടെ വൈദ്യുതി ഉല്‍പാദിപ്പിച്ചെന്ന് മന്ത്രി വ്യക്തമാക്കി. തൊട്ടിയാര്‍ ജല വൈദ്യുതി പദ്ധതി നാല്‍പ്പത് മെഗാവാട്ട് ശേഷിയുള്ളതാണെന്നും മന്ത്രി കെ കൃഷ്ണന്‍കുട്ടി പറഞ്ഞു.
മറ്റു സംസ്ഥാനങ്ങളില്‍ നിന്നും കൈമാറ്റ കരാര്‍ പ്രകാരം വലിയ തോതില്‍ വൈദ്യുതി ലഭ്യമാക്കാനും തീരുമാനമായിട്ടുണ്ട് .ഇതോടെ ലോഡ് ഷെഡിങ് ഉള്‍പ്പെടെയുള്ള തീരുമാനങ്ങളിലേക്ക് പോകേണ്ടി വരില്ലെന്ന വിലയിരുത്തലിലാണ് കെ എസ് ഇ ബി.
