മലയാളി താരം ആരണ് ജോര്ജിന് സെഞ്ച്വറി; അണ്ടര് 19 ലോകകപ്പ് ഫൈനലില് കടന്ന് ഇന്ത്യ
ഹരാരെ (സിംബാബ്വെ): മലയാളി താരം ആരണ് ജോര്ജിന്റെ സെഞ്ച്വറി മികവില് ഇന്ത്യ അണ്ടര് 19 ലോകകപ്പ് ഫൈനലില് കടന്നു. സെമിയില് അഫ്ഗാനിസ്ഥാനെ ഏഴ് വിക്കറ്റിനാണ് ഇന്ത്യ തോല്പ്പിച്ചത്. അഫ്ഗാന് ഉയര്ത്തിയ 311 റണ്സ് വിജയ ലക്ഷ്യം 41.1 ഓവറില് വെറും മൂന്ന് വിക്കറ്റ് മാത്രം നഷ്ടത്തില് ഇന്ത്യ മറികടക്കുകയായിരുന്നു.
വെള്ളിയാഴ്ച നടക്കുന്ന ഫൈനലില് ഇന്ത്യ ഇംഗ്ലണ്ടിനെ നേരിടും. ടൂര്ണമെന്റിന്റെ ചരിത്രത്തില് ഏറ്റവും അധികം തവണ കപ്പ് നേടിയിട്ടുള്ള ഇന്ത്യ തങ്ങളുടെ പത്താം ഫൈനലിനാണ് ഇപ്പോള് യോഗ്യത നേടിയിരിക്കുന്നത്. കൂറ്റന് വിജയ ലക്ഷ്യം പിന്തുടര്ന്ന ഇന്ത്യക്ക് വെടിക്കെട്ട് തുടക്കമാണ് വൈഭവ് സൂര്യവംശി 68(33) നല്കിയത്.
പത്താം ഓവറില് അഫ്ഗാന് ആദ്യ വിക്കറ്റ് സമ്മാനിച്ച് മടങ്ങുമ്പോള് നാല് സിക്സറുകളും ഒമ്പത് ബൗണ്ടറികളും വൈഭവ് അടിച്ച് കൂട്ടിയിരുന്നു. മറ്റൊരു ഓപ്പണറും മലയാളി താരവുമായ ആരണ് ജോര്ജ് മിന്നും സെഞ്ച്വറിയോടെ ടീമിനെ വിജയത്തിലേക്ക് നയിച്ചു 104 പന്തുകളില് നിന്ന് 115 റണ്സ് നേടിയാണ് കോട്ടയം സ്വദേശിയായ താരം പുറത്തായത്. 15 ബൗണ്ടറികളും രണ്ട് സിക്സറുകളും ആരണ് അടിച്ചെടുത്തിരുന്നു
