സംസ്ഥാനത്ത് വൈദ്യുതി ഉപയോഗം എക്കാലത്തെയും ഉയര്ന്ന നിരക്കില്
തിരുവനന്തപുരം: സംസ്ഥാനത്ത് വൈദ്യുതി ഉപയോഗം എക്കാലത്തെയും ഉയര്ന്ന നിരക്കില്. 117 ദശലക്ഷം യൂണിറ്റിന് മുകളിലേക്ക് എത്തിയതോടെ സംസ്ഥാനത്ത് അപ്രഖ്യാപിത ലോഡ് ഷെഡിങ് ആരംഭിച്ചു. ഇതോടെ രാത്രി കാലങ്ങളില് 15 മിനിറ്റ് ലോഡ് ഷെഡിങ് ഏര്പ്പെടുത്താന് വൈദ്യുതി ബോര്ഡ് വാക്കാല് നിര്ദേശം നല്കിയിരിക്കുകയാണ്.
ഒരാഴ്ച മുന്പ് തന്നെ മലബാര് മേഖലയിലെ ചില ഭാഗങ്ങളില് ലോഡ് ഷെഡിങ് ആരംഭിച്ചിരുന്നു. ഇതിന് പിന്നാലെ തിരുവിതാംകൂര്, കൊച്ചി മേഖലകളിലും 10-15 മിനിറ്റ് ലോഡ് ഷെഡിങ് തുടങ്ങി. എന്നാല് ലോഡ് ഷെഡിങ് ആരംഭിച്ചിട്ടില്ലെന്നും വൈദ്യുതി പ്രതിസന്ധി നേരിടാന് ചില നിര്ദേശങ്ങളും ക്രമീകരണങ്ങളും ഏര്പ്പെടുത്തുക മാത്രമാണ് ഉണ്ടായതെന്നുമാണ് കെഎസ്ഇബി അധികൃതര് വ്യക്തമാക്കുന്നത്. വരും ദിവസങ്ങളിലും ചൂട് തുടര്ന്നാല് 30 മിനിറ്റ് വരെയുള്ള നിയന്ത്രണങ്ങള് രാത്രിയില് വേണ്ടി വന്നേക്കാമെന്നാണ് സൂചന.
അതേസമയം കനത്ത ചൂടിനെ തുടര്ന്ന് ഇന്ന് 12 ജില്ലകളില് മുന്നറിയിപ്പ് നല്കിയിട്ടുണ്ട്. സംസ്ഥാനത്ത് ഏറ്റവും കൂടുതല് ചൂട് അനുഭവപ്പെടുന്ന പാലക്കാട് ജില്ലയില് ഇന്നും നാളെയും താപനില 40 ഡിഗ്രി സെല്ഷ്യസ് വരെ ഉയരാം.
ഉഷ്ണതരംഗവുമായി ബന്ധപ്പെട്ട സാഹചര്യം വിലയിരുത്താന് ഇന്ന് മുഖ്യമന്ത്രിയുടെ നേതൃത്വത്തില് ഉന്നതതല യോഗം ചേരും. രാവിലെ 11 ന് ഓണ്ലൈന് ആയാണ് യോഗം ചേരുക
