സംസ്ഥാനത്ത് താപനില 40 ഡിഗ്രിക്ക് മുകളില്: കേരളത്തില് സെല്ഫ് ലോക്ക്ഡൗണിന് ആഹ്വാനം ചെയ്ത് മുഖ്യമന്ത്രി
തിരുവനന്തപുരം: സംസ്ഥാനത്ത് താപനില 40 ഡിഗ്രി സെല്ഷ്യസിന് മുകളിലെത്തിയതോടെ മുന്നറിയിപ്പുമായി മുഖ്യമന്ത്രി പിണറായി വിജയന്. പാലക്കാട്, കൊല്ലം, തൃശൂര് ജില്ലകളില് കേന്ദ്ര കാലാവസ്ഥാ വകുപ്പ് ഔദ്യോഗികമായി ഉഷ്ണതരംഗ മുന്നറിയിപ്പ് പ്രഖ്യാപിച്ചു.
ചൂട് വര്ധിക്കുന്നത് ഗുരുതരമായ ആരോഗ്യ പ്രശ്നങ്ങള്ക്കും ജീവന് തന്നെ അപകടപ്പെടാനും കാരണമായേക്കാം. അതിനാല് താഴെ പറയുന്ന സുരക്ഷാ നിര്ദേശങ്ങള് എല്ലാവരും കര്ശനമായി പാലിക്കണമെന്നും മുഖ്യമന്ത്രി പറഞ്ഞു.
പകല് 11 മുതല് മൂന്ന് വരെ പുറത്തിറങ്ങരുത്: ഈ സമയത്ത് നേരിട്ട് വെയിലേല്ക്കുന്നത് ഒഴിവാക്കുക. കോവിഡ് കാലത്തെപ്പോലെ ഇതൊരു സെല്ഫ് ലോക്ക്ഡൗണ് സമയമായി കണ്ട് അനാവശ്യ യാത്രകളും പുറംപണികളും ഒഴിവാക്കാന് ശ്രദ്ധിക്കണം. വീടിനകത്തും തൊഴിലിടങ്ങളിലും നല്ല വായു സഞ്ചാരം ഉറപ്പാക്കണം.
വെള്ളവും ഭക്ഷണവും: ദാഹമില്ലെങ്കിലും ധാരാളം ശുദ്ധജലം കുടിക്കുക. നിര്ജ്ജലീകരണം ഉണ്ടാക്കുന്ന പാനീയങ്ങള് ഒഴിവാക്കാം. പോഷക സമൃദ്ധമായ ഭക്ഷണം കഴിക്കാന് ശ്രദ്ധിക്കുക.
വസ്ത്രധാരണം: ഇളം നിറത്തിലുള്ള, അയഞ്ഞ കോട്ടണ് വസ്ത്രങ്ങള് ധരിക്കുക. പുറത്തിറങ്ങുമ്പോള് കുട, പാദരക്ഷകള്, സണ്ഗ്ലാസ് എന്നിവ നിര്ബന്ധമായും ഉപയോഗിക്കുക.
പ്രത്യേക ശ്രദ്ധ വേണ്ടവര്: പ്രായമായവര്, കുട്ടികള്, ഗര്ഭിണികള്, മുലയൂട്ടുന്ന അമ്മമാര്, ഹൃദ്രോഗം, പ്രമേഹം, കാന്സര്, ചര്മ രോഗങ്ങള് തുടങ്ങിയ ആരോഗ്യ പ്രശ്നങ്ങളുള്ളവരും ആല്ബനിസം ബാധിച്ചവരും ഈ സമയങ്ങളില് പുറത്തിറങ്ങുന്നത് പൂര്ണമായും ഒഴിവാക്കുക.
പൊതുപരിപാടികള്ക്ക് നിയന്ത്രണം: പകല് 11 മുതല് മൂന്ന് വരെ തുറസായ സ്ഥലങ്ങളിലെ പൊതുയോഗങ്ങള്, കലാകായിക പരിപാടികള് എന്നിവ പാടില്ല. ഉത്സവങ്ങളിലെ പകല്പ്പൂരങ്ങള്, ആന എഴുന്നള്ളിപ്പ്, വെടിക്കെട്ട് എന്നിവ ഒഴിവാക്കുകയോ സമയക്രമീകരണം നടത്തുകയോ വേണം. തീപിടുത്ത സാധ്യതകള്ക്കെതിരെ കനത്ത കരുതല് വേണം.
മിണ്ടാപ്രാണികളെ മറക്കരുത്: വളര്ത്ത് മൃഗങ്ങള്ക്കും തെരുവിലെ മൃഗങ്ങള്ക്കും കുടിവെള്ളവും തണലും ഉറപ്പാക്കണം. പകല് സമയത്ത് അവയെ മേയാന് വിടരുത്. കടുത്ത ചൂടില് മൃഗങ്ങള്ക്ക് അസ്വസ്ഥതയുണ്ടാകുമെന്നതിനാല് വന്യജീവികളുടെയും തെരുവുനായ്ക്കളുടെയും ആക്രമണ സാധ്യതകള്ക്കെതിരെയും ജാഗ്രത വേണം
