വിപണിയിൽ വിജയ ആഘോഷം

കൊച്ചി: മഹാരാഷ്ട്രയിലെ ബി.ജെ.പിയുടെ ത്രസിപ്പിക്കുന്ന തിരഞ്ഞെടുപ്പ് ജയവും വിദേശ നിക്ഷേപകരുടെ മടങ്ങിവരവും ഇന്ത്യൻ ഓഹരി വിപണിയെ ആവേശ കൊടുമുടിയിലേക്ക് ഉയർത്തി. പ്രധാന മേഖലകളിലെ ഓഹരികളെല്ലാം ഇന്നലെ നേട്ടമുണ്ടാക്കി. ബി.എസ്.ഇ സെൻസെക്സ് 992.74 പോയിന്റ് കുതിച്ച് 80,109.85ൽ അവസാനിച്ചു. ദേശീയ സൂചിക 314.60 നേട്ടത്തോടെ 24,221.90ൽ എത്തി. കഴിഞ്ഞ രണ്ട് ദിവസങ്ങളിലായി സെൻസെക്‌സ് 3,000 പോയിന്റ് നേട്ടമാണുണ്ടാക്കിയത്. ആഗോള വിപണികളിലെ ഉണർവും ഇന്ത്യൻ നിക്ഷേപകർക്ക് ആവേശം പകർന്നു. ബി.ജെ.പിയുടെ ആധികാരിക വിജയം ഇന്ത്യയുടെ ഭരണ സ്ഥിരതയ്‌ക്ക് അടിവരയിടുന്നതാണെന്ന വിലയിരുത്തലാണ് ഗുണമായത്.